Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 269 Hüküm no: 421 Orijinal metin no: [39a(2)-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye ve evindekilerin kalpazanlık yaparken yakalandığı Mahmiye-i Üsküdar’da subaşı olan Müstedâm bendeleri bu dâ‘îlerine gelip yava âmili Ömer’in oğlu Mehmed Paşa Câmii kurbunda Musa Reis nâm kimesnenin kızı Râziye evinde kallâblar var deyu haber verdi deyicek kıbel-i şer‘den Mevlânâ Mehmed ile Subaşı Müstedâm ve Yayabaşı Mehmed ve yoldaşları ve bu dâ‘îlerinin çukadârı Mustafa bendeleri cem‘-i kesîr ve cemm-i gafîr ile irsâl olunup vardıklarında mezbûre Râziye’nin evinde kirâya verdiği evin içinde İbrahim b. Abdullah ve Ahmed Halîfe b. Uğurlu ve Sinan b. Mehmed nâm kimesneler ile Emine bt. Abdullah ve Karakaş Aynî bt. Hasan ve diğer Emine bt. Abdullah nâm hâtunları bulup mezbûr Sinan ve İbrahim soyunmuşlar imiş bizi gördüklerinde olan kalp akçeleri bahçeye saçtılar cem‘ edip bir mikdâr sikkeli ve bir mikdâr sikkesiz akçeler bulunup ve oturdukları yerde bir örs ve iki çekiç ve âhar evin içinde iki makas ve yedi sikke ve kürek ve balçık ve sâir âlât ve bir yerde dahi gevher ve potalar bulunup ev sâhîbesi Râziye’yi ve mezbûrât hâtunları ve mezbûrun kallâbları meclis-i şer‘a getirip vâki‘ hâl suâl olundukda evvelâ inkâr edip ba‘dehû mezbûr Sinan ben bir fakīr sipâhiydim bana bu cümle gel birkaç akçe yaslayıver dediler ben de vardım bunlar ittifâkla işlerler deyip ve mezbûr İbrahim bunlarla dostluğum var idi âna geldim deyip ve’l-hâsıl cümlesinin ittifâkı ile amel etmek fehm olundukdan sonra evlerinin esbâbı hıfz ve zabt olunmaya âdem gönderildikde evlerinde çukadâr bendeleri elli sikke dahi bulup getirdikde vâki‘ hâl bu minvâl üzre tahrîr olundu. Tahrîren fî evâhiri Şa‘bâni’l-mu‘azzam sene elf. Şuhûdü’l-hâl: ( )