Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 271 Hüküm no: 424 Orijinal metin no: [39b(2)-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin’in, köle olmadığı İşbu orta boylu, açık kaşlı Hüseyin nâm kimesne mahfil-i kazâda hâlâ efendisi ve yedi yed-i husûmet olan Mehmed Bey b. Ahmed er-râcil mahzarında takrîr-i kelâm edip ben Rumeli’nde vâki‘ kazâ-i Şirine’ye tâbi‘ Akköpük nâm karyeden Ali nâm kimesnenin ve Ayşe’nin oğlu olup kat‘â ebeveynime rık târî olmamış iken Veli nâm kimesne bir tarîk ile idlâl edip İstanbul’a getirdikde merkūm Mehmed Bey’e bey‘ eyledi hürriyetim taleb ederim merkūm Mehmed Bey cevâb verip mezbûr Hüseyin’i mezkûr Veli’den yedi bin akçeye iştirâ eyledim hürriyetini beyân eylesin dedikde udûl-i müslimînden karye-i mezbûre kurbunda Tuşengi nâm karye sükkânından Mevlânâ Ali b. Dikidaş, Mehmed b. Allahverdi nâm kimesneler mahfil-i kazâya hâzırân olup edâ-yı şehâdet-i şer‘iyye edip fi’l-hakīka mezbûr Hüseyin karye-i Akköpük sâkinlerinden Ali nâm kimesnenin ve Ayşe’nin oğludur kat‘â ebeveynine rık târî olmamışdır bu husûsa şâhidleriz şehâdet ederiz dediklerinde ba‘de’t-ta‘dîl ve’t-tezkiye hayyiz-i kabûlde vâki‘ olup hürriyetine hükm olundukdan sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Zülfikar b. Mehmed, Bayram b. Abdi, Süleyman b. Kemal, Müstecâb b. Mustafa, Mehmed b. Behrâm ve gayruhüm