Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 271 Hüküm no: 425 Orijinal metin no: [39b(2)-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kınalı Ada’nın bazı vergilerinin üç yıllığına mukâtaaya verildiği Budur ki Mahrûse-i Üsküdar muzâfâtından Kınalı Ada demekle ma‘rûf ada sâkinlerinden İstesnoz v. Veniş nâm zimmî mahfil-i kazâya gelip merhûm ve magfûrun-leh Şehzâde Sultân Mehmed Hân tâbe serâhu hazretlerinin evkāfına bi’l-fi‘l mütevellî olan kıdvetü’l-emâsil ve’l-akrân Mehmed Bey b. Abdurrahman nâm kimesnenin hâtemi ile mahtûm tezkire ibrâz edip mazmûnunda evkāf-ı mezbûreden cezîre-i Surh’a tâbi‘ Kınalı Ada’nın ispençe ve cürm ü cinâyet ve bâd-ı hevâ ve sâir rüsûmunu sene elf Mart’ı ibtidâsından üç yıl tamâmına değin İstesnoz nâm zimmîye on dört bin akçe ki te’kîden bi’l-asl nısf yedi bin akçe olur verip ve meblağ-ı mezbûr on dört bin akçeyi merkūm zimmî yedinden bi’t-tamâm ve’l-kemâl alıp kabz eyledim ba‘de’l-yevm zikr olunan adayı sâir kimesneler ne vechile mutasarrıf olurlar ise mezbûr dahi ol minvâl üzre mutasarrıf olup kimesne mâni‘ olmaya deyu mukayyed olup ve kıbel-i şer‘den dahi temessük taleb etmeğin bu hurûf tahrîr olundu. Tahrîren fi’t-târihi’l-mezbûr. Şuhûdü’l-hâl: Mehmed b. Behrâm, Mehmed b. Habîb, Sefer b. Abdullah ve gayruhüm