Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 273 Hüküm no: 430 Orijinal metin no: [40a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mustafa’nın, Mehmed b. Durmuş’tan muhâla‘a yoluyla boşandığı Mahmiye-i Kostantıniyye’de Ördek Kasab mahallesi sâkinelerinden Ayşe bt. Mustafa tarafından Mustafa b. Abdullah ve Murad b. Abdullah şehâdetleriyle vekâleti sâbite olan Hasan Bey b. Abdullah el-cündî Dergâh-ı âlî müteferrikalarından fahrü’l-emâsil ve’l-akrân Mehmed b. Durmuş nâm kimesne mahzarında ikrâr ve i‘tirâf edip müvekkilem mezbûre Ayşe zimmetinde merhûm Mehmed Bey bin beş yüz akçesi var idi hâlen zikr olunan bin beş yüz akçeyi bi’t-tamâm mezbûr Mehmed Bey alıp kabz edip ve mezbûr Ayşe merkūm Mehmed Bey zimmetinde mehr-i mü’eccel olan dört bin akçeden ve nafaka-i iddetinden ve sâir nikâha müte‘allik olan da‘vâsından ferağ edip mezbûr Mehmed Bey vech-i meşrûh üzre hul‘ edip talâk-ı bâyin ile talâk verdi dedikde mezbûr Mehmed Bey dahi bi’l-muvâcehe tasdîk ve tahkīk eylediği kayd olundu. Şuhûdü’l-hâl: Hasan Usta [b.] Mahmud, el-Hâc Memi b. Abdullah, Cafer b. Alagöz, Mehmed b. Abdullah, Mehmed b. Behrâm, Osman Bey el-cündî, Sefer b. Abdullah