Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 274 Hüküm no: 431 Orijinal metin no: [40a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin köle olmadığı için alıcı ile satıcının anlaşmazlığının giderilmesi Budur ki Mehmed b. Ahmed er-râcil mahfil-i kazâda Veli b. Abdullah er-râcil mahzarında da‘vâ edip bundan akdem orta boylu açık kaşlı gök elâ gözlü Hüseyin nâm kimesneyi kuldur deyu bana yedi bin akçeye bey‘ eylemiş idi hâlâ mezbûr Hüseyin, Şirin kazâsına tâbi‘ Akköpük nâm karyeden Ali nâm kimesnenin oğlu olup kat‘â ebeveynine rık târî olmadığını isbât eyledi hâlâ meblağ-ı mezbûr yedi bin akçeyi taleb ederim dedikde gıbbe’s-suâl mezbûr Veli fi’l-hakīka mezbûr Mehmed beni Kefe’de Fazlı nâm dellâldan altı bin beş yüz akçeye bir kul iştirâ edip birkaç günden sonra yedi bin akçeye bey‘ eylemiş idim lâkin ol kul hürriyetini isbât eylediğini beyân eylesin dedikde udûl-i müslimînden Zülfikar b. Mehmed ve Abdullah b. Abdullah nâm kimesneler edâ-yı şehâdet-i şer‘iyye edip fi’l-hakīka mezbûr Mehmed’in merkūm Veli’den aldığı mevsûf-ı merkūm Hüseyin hürriyetini isbât eyledi bu husûsa şâhidleriz şehâdet dahi ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup meblağ-ı mezbûr mezbûr Mehmed’e hükm olunup mâ hüve’l-vâki‘ bi’t-taleb tahrîr olundu. Şuhûdü’l-hâl: Mehmed b. Abdullah er-râcil, Murad b. Abdullah, Fazlı b. Abdullah, Mehmed b. Behrâm ve gayruhüm