Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 289 Hüküm no: 466 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Hüseyin’in ölmeden önce malının üçte birini hayır için vasiyet ettiği Oldur ki Süleyman b. Hayran Abdi mahfil-i şer‘de işbu karye-i Bulgurlu’dan olup fevt olan Yusuf b. Hüseyin nâm kimesnenin oğlu Beyti ve kızı Nesli tarafından husûs-ı âtîye şer‘an vekîl olan Hasan b. İvaz nâm kimesneler mahzarlarında da‘vâ kılıp müteveffâ-yı mezbûr hâl-i hayâtında ve kemâl-i sıhhatinde ölmezden üç yıl mukaddem beni vasîyy-i muhtâr edip sülüs mâlım vasiyyetim olsun ben vefât eylediğimde vücûh-ı hayrâta sarf eyle dedi şimdi vefât edip vârisleri vasiyyeti vermek istemezler taleb eylerim dedikde gıbbe’s-suâl ve akībe’l-inkâr müdde‘î-i mezbûrun da‘vâsına muvâfık beyyine taleb olundukda udûl-i müslimînden ve sıkāt-ı muvahhidînden Hacı Bâli b. Ali ve Mehmed b. Şaban ve Ahmed b. Kaya ve el-Hâc Hasan el-imâm nâm kimesneler meclis-i şer‘a li ecli’ş-şehâde hâzırûn olup fi’l-vâki‘ merkūm mezbûr hâl-i hayâtında ve kemâl-i sıhhatinde ölmezden üç yıl mukaddem beni vasîyy-i muhtâr edip sülüs mâlım vasiyyetim olsun ben vefât eylediğimde vücûh-ı hayrâta sarf eyle dedi biz bu husûsa şâhidleriz şehâdet dahi ederiz dediklerinde şâhidûnun şehâdetleri hayyiz-i kabûlde vâki‘ oldukdan sonra müteveffâ-yı mezbûrun yirmi dört bin akçe metrûkâtı zuhûr edip sekiz bin akçeyi sülüs mâlın tenfîzine kıbel-i şer‘den vasîyy-i muhtâr olan Süleyman iki bin akçesini fukarâya ve üç bin akçesin Bulgurlu Mescidi’nde imâm olan sûre-i sevâbıma kırâ‘at etmek için İmâm Hacı Hasan olmak üzre (…) mu‘âmele olunup bâkī kalan üç bin, kırkına değin fukarâya sarf oluna deyu Süleyman’a verildi tenfîze izin ve icâzet verildikden sonra mâ vaka‘a bi’t-taleb kayd olundu. Şuhûdü’l-hâl: Seyyid Sefer Bey b. es-Seyyid Hamza, Ali b. Abdullah, İbrahim b. Abdullah, Ahmed b. Ali, el-Hâc Hüseyin b. Mustafa, Şemseddin b. Sâdık