Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 295 Hüküm no: 479 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasab Süleyman b. Kemal’in vasisi olduğu Mehmed b. Ömer’in ev yerini, yetimin nafakası ve diğer ihtiyaçları için Mehmed Çelebi b. Hacı’ya sattığı Budur ki Mehmed b. Ömer nâm sagīre kıbel-i şer‘den vasî olan Kasab Süleyman b. Kemal mahfil-i kazâda bâ‘isü’l-hurûf Mehmed Çelebi b. Hacı nâm kimesne mahzarında ikrâr ve takrîr-i kelâm edip vasî olduğum yetîmin babasından irs-i şer‘le intikāl eden inde’l-ahâlî ma‘lûmü’l-hudûd ev yerini zarûret-i nafaka ve zarûret-i cerrâhiye için sûk-ı sultânîde beyne’t-tâlibîn otuz gün müzâyede olunup mezbûr Mehmed Çelebi Bey üzerinde iki bin akçede karâr edip ziyâdeye tâlib olmamağın zikr olunan ev yerinin içinde eşcâr-ı müsmire ve gayrımüsmiresiyle mezbûr Mehmed Çelebi’ye iki bin akçeye [bey‘] edip bin akçesini alıp kabz edip bin akçesi bâkī kaldı dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Mirzâ Bâzârbaşı İbrahim, Ali Halîfe b. Mahmud, Muttalib b. Süleyman, Hacı Hamza b. Abdullah, Yakub Akīdeci, Hasan b. Sâdık ve gayruhüm