Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 294 Hüküm no: 478 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çavuş b. Mehmed’in, Ferhad b. Sefer’e olan borçlarını ödediği Dergâh-ı âlî çavuşlarından Ahmed Çavuş b. Mehmed vilâyet-i Anadolu’da Kilis nâm kasabada işbu sâhibü’l-kitâb Ferhad b. Sefer nâm kimesne mahfil-i kazâya ihzâr ve mahzarında ikrâr ve i‘tirâf kılıp bundan akdem mezbûr Ferhad benim zimmetimde gümüş raht ve kumaş bahâsından cem‘an altmış bin akçe hakk-ı şer‘îsi olmağın ben dahi mezbûr Ferhad’da olan deynimin ve bevvâb-ı hümâyûnda defterhâne kâtibleri şâkirdlerinden Sarrâf Ahmed nâm kimesneye mezbûr Ferhad’ın tîmarı husûsu için on dört bin akçe verip ve yine Divân-ı hümâyûn kâtiblerinden Mehmed Çelebi nâm kimesnenin zimmetinde olan on bin akçeyi mezbûr Ferhad havâle edip ve Kilis kazâsında vâki‘ olup mutasarrıf olduğu tîmarımın işbu dokuz yüz doksan dokuz senesinde vâki‘ olan mahsûlden dahi yirmi bin akçemi havâle edip cem‘an mezbûr Ferhad’a olan altmış bin akçe deynimden kırk dört bin akçesini zikr olunan yerlerden mezbûr Ferhad’a edâ ve havâle eyledim ve bâkī kalan on dört bin akçesini zikr olunan yerlerden mezbûr Ferhad dahi vech-i meşrûh üzre olan havâleye râzı oldukdan sonra mezbûr Ahmed Çavuş ikrârını tasdîk eyledikde vâki‘ hâl mezkûr Ferhad talebiyle ketb olunup yedine vaz‘ olundu ki vakt-i hâcetde ihticâc edine. Tahrîren fî evâsıtı şehri Rebî‘ilâhir sene tis‘a ve tis‘în ve tis‘a mie. Şuhûdü’l-hâl: Hamza b. Emrullah Çavuş-ı Dergâh-ı âlî, Fazlı Çelebi b. ( ), Süleyman Çelebi b. Mehmed, Memi Bey b. Abdullah, Kâtib Ali Çelebi, Ali Bey b. Abdullah