Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 296 Hüküm no: 483 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa’nın vasisi Mehmed b. Ali’nin, Mustafa’nın babasının borçları için yetime kalan evi sattığı Bundan akdem vefât eden Nasûh b. Halîfe’nin sagīr oğlu Mustafa’ya kıbel-i şer‘den vasî nasb olan Mehmed b. Ali mahfil-i kazâda müteveffâ-yı mezbûrun zevce-i metrûkesi olan Nazlı bt. Ali nâm hâtun mahzarında ikrâr edip müteveffâ-yı mezbûrun deyni menkūlâtına vefâ etmeyip Torbalı mahallesinde Ümmü Hâtun bt. Hasan ve Kayıkçı İbrahim mülkleriyle ve iki tarafı tarîk-i âm ile mahdûd olan bir evini ve bir kulübe evi ve iki odayı ve fırını ve kuyuyu ve bahçeyi ve eşcâr-ı müsmire ve gayrımüsmireyi ve havluyu müştemil olan mülk menzilinin bey‘i lâzım ve lâbüd olmağın sûk-ı sultânîde beyne’t-tâlibîn ve’r-râgıbîn nice günler müzâyede olundukda on yedi bin akçede karâr edip mezbûre Nazlı üç bin akçe dahi ziyâde eylemeğin mezbûreye yirmi bin akçeye bey‘-i bâtt-ı sahîh-i şer‘î birle bey‘ edip beş bin akçesi mezbûre hâtunun mehrine ve dokuz bin akçesi dahi Yaya Çelebi Vakfı’na mezbûrenin kefâleten edâ eylediği deyne ve dört bin akçe dahi Torbalı vakfına ve kapuya ve bin akçe dahi yine kefâleten Mihrî Hâtun akçesine edâ eylediği deyne ve iki bin dört yüz akçe dahi Ferruh Kethüdâ Vakfı’na ve altı yüz akçe dahi mahalle-i mezbûrede vâki‘ at akçesi vakfına edâ eylediği deynleri ki cem‘an yirmi iki bin akçe olur zikr olunan yirmi iki bin akçenin yirmi bini evin deynine mukāssa edip meblağ-ı mezbûru alıp kabûl ve kabz eyledi dedikde mukırr-ı mezbûrun vech-i meşrûh üzre vâki‘ olan ikrârını mukarran lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Fî evâsıtı şehri Ramazâni’l-mübârek sene elf. Şuhûdü’l-hâl: Murad Halîfe el-hatîb, Müstedâm Bey b. Abdülmennân, Müstecâb b. Mustafa, Seyyid Mehmed b. es-Seyyid Sâdık, Mehmed b. Behrâm, Ali b. Mahmud ve gayruhüm Yevmü’l-cum‘a es-sâdis aşer min şehri Ramazâni’l-mübârek li sene elf