Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 297 Hüküm no: 484 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. Ahmed Bey’in yaptığı evlere yol yapılması için evlâdlarına arâzi vakf ettiği Mahrûse-i Üsküdar’da Hamza Fakih mahallesinden Emine Hâtun bt. Ahmed Bey tarafından husûs-ı âtîye Ali b. Abdullah ve Kasım Çelebi b. Hasan şehâdetleriyle vekâleti sâbite olan İbrahim Bey b. Pîrî el-cündî mahfil-i kazâda Mümine bt. İbrahim Bey yine şâhidân-ı mezbûrânın şehâdetleriyle husûs-ı âtîye vekâleti sâbite olan Ahmed Bey nâm kimesne mahzarında ikrâr ve takrîr-i merâm kılıp müvekkilem mezbûre Emine’nin mahalle-i mezbûrede bir tarafı Mustafa Çavuş ve bir tarafı Zâhide Hâtun mülküne ve bir tarafı yine Emine mülküne ve bir tarafı Nakkaş kızı Fâtıma mülküne muttasıl işbu hudûd ile mahdûd olup tûlü otuz beş zirâ‘ ve arzı yirmi zirâ‘ olan binâ eyledikleri evlerin yolu için yine evlâda vakıf olmak şartıyla arzı iki buçuk zirâ‘ ve tûlü yirmi dokuz zirâ‘ ve bir tarafı Zâhide ve bir tarafı kendi mülküne müntehâdır evlâddan her kim evler binâ eylerse birbirine mâni‘ olmamak şartıyla müşterek yollar olmak üzre mezbûreye hibe ve temlîk eyledi dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Süleyman b. Hayran, el-Hâc Hüseyin [b.] Veliyyüddin, Mirzâ Bâzârbaşı b. İbrahim, Şemseddin [b.] Sâdık, el-Hâc Hüseyin [b.] Mustafa ve gayruhüm