Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 298 Hüküm no: 485 Orijinal metin no: [46a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey’in hizmetkârını kandıran Sefer Bey ile anlaştığı Budur ki Mahrûse-i Üsküdar sükkânından Mustafa Bey el-cündî mahfil-i kazâya gelip bundan akdem Sefer Bey el-cündî benim bir hizmetkârım on bin nakid akçe ile idlâl ettirdin deyu Nâzır Mehmed Bey ile mâ-beynlerinde münâza‘at-ı kesîre vâki‘ oldukda mezbûr Mehmed Bey rızâsıyla beş bin akçeye ıslâh eyleyip lâkin yanında akçesi olmamağın iki bârgîr ve bir siyah dikdik ve bir araba ve bir kolon ve bir çift üzengi ve bir berber leğeni ve bir ibrik ve bir iç edek ve bir köhne sâde raht ve bir makrama ve bir fota ve bir köhne alaca şalvar yeni ve bir cedîd sarı çizme ve bir tülbent ve bir mâî muhattem kuşak ve bir poturum çukasından çakşır ve bir mor iskarlat ferâce ve bir kırmızı uzun yenli ferâce ve bir sepet bu cümle esbâbı bana ma‘rifet-i şer‘le emânet vaz‘ edip târih-i kitâbdan yirmi gün tamâmına değin beş bin akçeyi kendim getirip veyâhud göndermezsem zikr olunan esbâbı merkūm Cafer Bey şer‘le teslîm eyle demiş idi hâlâ müddet tamâm olup on gün dahi mürûr eyledi gelmedi mezbûr Cafer Bey’e teslîm olunmasını taleb ederim dedikde merkūm Cafer Bey şer‘a getirilip zikr olunan esbâb teslîm olundukda mezbûr dahi cümle esbâbı alıp kabz eyledim husûs-ı mezbûr için mezbûr Nâzır Mehmed Bey’in zimmetini ibrâ’-i âm ile ibrâ’ eyledim dedikde mâ vaka‘a bi’t-taleb tahrîr olundu. Şuhûdü’l-hâl: Veli Bey b. Alagöz el-cündî, Korkud Bey el-cündî, Sefer Hoca el-müezzin, Ahmed Bey [b.] Mustafa, el-Hâc Ali Halîfe b. Mahmud, Mehmed Bey [b.] Abdullah el-cündî, Osman Bey Kâtib-i beytülmâl-ı hâssa, el-Hâc Kurd b. Beşir, Hasan Bâzârbaşı sâbıkan, Ömer el-müezzin be-Şemsi Paşa sâbıkan ve gayruhüm