Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 299 Hüküm no: 488 Orijinal metin no: [46b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan bt. Zülfikar’ın çayırına başkasının müdâhalesinin engellenmesi Mahrûse-i Üsküdar muzâfâtından Samandıra nâm karye sâkinelerinden Sultan bt. Zülfikar nâm hâtun mahfil-i kazâda Dergâh-ı âlî çavuşlarından fahrü’l-akrân Bâli Çavuş mahzarında takrîr-i da‘vâ edip bundan akdem babam Zülfikar hâl-i hayâtında bir cânibi Paşa Çayırı’yla ve iki tarafı tarîk-i âmla mahdûd ve mümtâz olup Tosun Çayırı demekle ma‘rûf olan çayırı anamdan intikāl eden dört bin akçem ile alıverip benim mülküm iken babam gāyib olup hayâtı ve memâtı ma‘lûm değil iken vefât etti deyu karye-i mezbûre zâbiti olan Haydar Bey sâir çayırı âhara tapu ile verdikde bundan akdem mahrûse-i mezbûrede hâkimü’ş-şer‘ olan a‘lemü’l-ulemâi’l-kirâm Mevlânâ Bekāyî Efendi hazretlerinin huzûr-ı şerîflerinde zikr olunan çayırı babam benim akçem ile alıverip mülküm idiğini mûmâileyh Haydar Ağa huzûrunda isbât edip hükm olunup sicill-i mahfûza kayd olunmuş iken müşârunileyh Bâli Çavuş fuzûlî tasarruf eder dedikde fi’l-hakīka zikr olunan hudûd ile mahdûd olan çayır mezbûre Sultan’ın olup Mevlânâ Bekāyî Efendi merkūm Haydar Ağa’nın muvâcehesinde hükm olunduğu sicill-i mahfûzda mastûr ve mukayyed oldukda mûmâileyh Bâli Çavuş zikr olunan çayırı Divân-ı hümâyûn kâtiblerinden fahrü’l-akrân Mahmud Çelebi’den aldım mazmûn-ı sicil beyân etsin dedikde Mahmud b. Abdullah er-râcil ve Mustafa b. Ali ve Hasan b. Bâli nâm kimesneler fi’l-hakīka zikr olunan çayırı mezbûrenin babası Zülfikar hâl-i hayâtında anasından intikāl eden dört bin akçe ile alıverdiği ma‘lûmumuzdur ve merkūm Haydar Ağa mahzarında sâbit olup sicil olunmuşdur deyu mazmûn-ı sicili şehâdet eylediklerinde ber mûceb-i şer‘-i şerîf zikr olunan çayır merkūme Sultan’a hükm olunup mâ hüve’l-vâki‘ bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Hacı Hüseyin [b.] Mustafa, Muttalib [b.] Süleyman, Mehmed b. Sâdık, Müstedâm Bey el-cündî ve gayruhüm