Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 300 Hüküm no: 489 Orijinal metin no: [46b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nurullah Bey b. Şah’ın, Mahmud Paşa Zülfikar Bey’deki alacaklarını tahsil ettiği Vilâyet-i Anadolu’da kasaba-i Eğridir sâkinlerinden fahrü’l-akrân Nurullah Bey b. Şah Mehmed mahfil-i kazâda bâ‘isü’l-kitâb emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm el-muhtas bi mezîdi inâyeti’l-meliki’l-a‘lâ sâbıkan Anadolu beylerbeyisi olan Mahmud Paşa -dâme ikbâluhû- hazretlerinin dîvân kâtibi olan kıdvetü’l-emâsil ve’l-akrân Zülfikar Bey mahzarında ikrâr ve takrîr-i kelâm edip müşârunileyh hazretlerine Hamid sancağında vâki‘ beş bin akçe tîmar husûsiçin mûmâileyh Zülfikar Bey yediyle on sekiz bin akçe verip tîmar fesh olmamağın meblağ-ı mezbûr on sekiz bin akçeyi müşârunileyh hazretlerinden mûmâileyh Zülfikar Bey yedinden bi’t-tamâm ve’l-kemâl alıp kabz eyledim müşârunileyh Mahmud Paşa hazretlerinde ve merkūm Zülfikar Bey zimmetinde bir akçem ve bir habbem kalmadı ba‘de’l-yevm da‘vâ edersem lede’l-hükkâm istimâ‘ olunmaya dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen tasdîk edip kayd olundu. Şuhûdü’l-hâl: Kıdvetü’l-kuzât Mevlânâ Veliyyüddin Efendi, Ali Subaşı, Hızır Çavuş b. Ahmed, Nasûh Bey el-kâtib ve gayruhüm