Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 301 Hüküm no: 491 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın, Mustafa b. Ali’nin yelkenini habersiz aldığı Budur ki Mustafa b. Ali nâm kimesne mahfil-i kazâda acemi oğlanı zümresinden Mehmed b. Abdullah nâm kimesne mahzarında takrîr-i da‘vâ edip bundan akdem mülkümden bir yelkenim zâyi‘ olmuş idi hâlâ mahmiye-i Galata’da bir kimesnenin yedinde bulup suâl eylediğimde mezbûru resmi ile haber verip gelip niçin yelkenimi ahz eyledin dedikde bir iştir oldu kıymetini vereyim demiş idi hâlâ vermede te‘allül eder suâl olunsun dedikde gıbbe’s-suâl ve akībe’l-inkâr udûl-i müslimînden Mehmed b. Abdullah ve Mustafa b. Şucâ‘ nâm kimesneler edâ-yı şehâdet-i şer‘iyye edip fi’l-hakīka mezbûr Mehmed bizim mahzarımızda merkūm Mustafa yelkenimizi niçin aldın dediği bir iştir oldu beni zabt eylemeyin kıymetini edâ edeyim dedi bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mâ vaka‘a bi’t-taleb tahrîr olundu. Şuhûdü’l-hâl: Hacı Hüseyin [b.] Mustafa, Ahmed Efendi el-müstaid, Muttalib [b.] Süleyman, Hüseyin b. Behrâm ve gayruhüm