Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 302 Hüküm no: 493 Orijinal metin no: [47a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arslan Bey’in, Miriye ve Haloliş? köylerinin mahsûl gelirlerini Mustafa Bey’e mukâtaaya verdiği Budur ki Eyâlet beylerinden kıdvetü’l-ümerâi’l-kirâm Macahil sancağı beyi olan Arslan Bey meclis-i şer‘-i şerîfde fahrü’l-ümerâi’l-kirâm İmirhev sancağı beyi Mustafa Bey mahzarında takrîr-i merâm edip taht-ı livâmda yedi bin akçe yazar Miriye nâm karyenin ve üç bin akçe yazar Haloliş? nâm karyede Alpaz nâm aznavurun tutageldiği re‘âyâlarından ve tutageldiği toprağında yirmi yıla varınca âid ve râci‘ olan mahsûlünü ve sâir rüsûmunu zabt ve kabz eylemek için müşârunileyh Mustafa Bey’e kırk bin akçeye verdim ve meblağ-ı mezbûru mûmâileyh yedinden alıp kabz eyledim ba‘de’l-yevm sene tamâmına varınca varıp zabt eyleyip bizim cânibimizden ve kardeşim Hüsrev Bey cânibinden ve subaşılarımız cânibinden ve aznavurlarımız cânibinden bir ferd dahl ve ta‘arruz etmeye dedikde mukırr-ı mezbûrun vech-i meşrûh üzre vâki‘ olan ikrârını mukarran lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Kıdvetü’l-emâcid ve’l-a‘yân Beşir Bey Ağa, Karaman Kethüdâsı Bayezid, Fahrü’l-cüyûş Bâli Çavuş Dergâh-ı âlî, Hüsrev Çavuş Dergâh-ı âlî, Mesih Çavuş, Ahmed Çavuş Dergâh-ı âlî, Fahrü’l-emâcid Mehmed Ağa, ez-Zevvâku’s-Sultânî ve gayruhüm