Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 305 Hüküm no: 498 Orijinal metin no: [47b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş’un, Kartal’daki çiftliklere yaptığı evlerin yıkılmadan önce kıymetlerinin belirlenmesini istediği Dergâh-ı âlî çavuşlarından fahrü’l-akrân Hüseyin Çavuş mahfil-i kazâya gelip mahrûse-i Üsküdar muzâfâtından Kartal nâm karyede vâki‘ binâ eylediği evlerimin havlusundan ba‘zı yerleri kadîmden kireçlikdir deyu karye-i merkūme zimmîleri da‘vâ edip yıkılmasına hükm olunmuş idi hâlâ zikr olunan yerde vâki‘ olan eser-i binâ ne mikdâr akçe ile binâ olunmuşdur tahmîn-i sahîh ile tahmîn olunmasın taleb ederim dedikde Mevlânâ Ahmed irsâl olunup ehl-i vukūf ile mahall-i mezbûra vardıklarında Aydın Reis b. Hasan ve Andon v. Pako ve Manol v. Yorgo ve Dimitri nâm kimesneler fi’l-hakīka yıkılmasına hükm olunan evler ve ahırlar otuz bin akçe ile ancak olur dediklerini mevlânâ-yı merkūm haber vermeğin bu hurûf ber sebîl-i temessük ketb u tahrîr olunup yed-i tâlibe vaz‘ u def‘ olundu ki lede’l-iktizâ kāti‘-i kîl u kāl ola. Tahrîren fî evâsıtı şehri Ramazâni’l-mübârek sene elf. Şuhûdü’l-hâl: es-Sâbikūn