Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 304 Hüküm no: 497 Orijinal metin no: [47b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş’un, Sultan Orhan Vakfı’na ait Kartal’daki çiftliklere evler yapıp, halkın kullanım alanlarını bozduğu Oldur ki Cenâb-ı cennet mekân firdevs-i âşiyân merhûm Orhan Sultan aleyhi’r-rahmetü ve’r-rıdvân hazretlerinin evkāfından mahrûse-i Üsküdar kurbunda vâki‘ Kartal nâm karye ahâlîsi umûmen Âsitâne-i sa‘âdet’e varıp karye-i mezbûrede evler ve çiftlikler binâ eden Dergâh-ı âlî çavuşlarından fahrü’l-akrân Hüseyin Çavuş kadîmden mîrî kireç döküle gelen yeri tağallüben alıp evler ihdâs eyledi dediklerinde husûs-ı mezbûrun istimâ‘ı Dergâh-ı âlî çavuşlarından kıdvetü’l-akrân İsmail Çavuş mübâşeretiyle efendi hazretlerine hitâben emr-i şerîf ihrâc edip mahall-i mezbûre varıldıkda karye-i mezbûreden Yorgi v. Kalayora ve Kamanoz v. Manol ve Todora v. İstirati nâm zimmîler ve sâir ahâlî-i karye-i mezbûre merkūm Hüseyin Çavuş mahzarında da‘vâ edip mezbûr Hüseyin Çavuş zikr olunan vakıf yerden selâtîn-i mâziye zamânından bu âna gelince mîrî kireç dökülü gelen yeri tağallüben alıp evler ihdâs edip zikr olunan mahalle nice Müslümanlar defn olunmuş iken makberelerin bozup üzerine eşcâr gars edip ve âmme tasarruf edip arabaların ve gemilerin bağlayıp ve kendiler teneffüs edicek mahalli mâlikāne tasarruf eder taleb ederiz dediklerinde gıbbe’s-suâl merkūm Hüseyin Çavuş zikr olunan yeri sâhib-i arzdan tapu ile aldım yedimde tezkire ve hüccetim vardır dediği bi’t-taleb tahrîr olunup yed-i tâlibe vaz‘ u def‘ olunduğu lede’l-iktizâ kāti‘-i kîl u kāl ola. Tahrîren fî evâsıtı şehri Ramazâni’l-mübârek sene elf. Şuhûdü’l-hâl: es-Sâbikūn