Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 306 Hüküm no: 500 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi’den oğlu Vasil’e kalan yerlerin Derviş b. Ahmed’e satıldığı, Vasil’in Müslüman olduğu Sebeb-i tahrîr-i hurûf oldur ki Vilâyet-i Anadolu’da vâki‘ kazâ-i Niğde sâkinlerinden olup bundan akdem mürd olan Yorgi nâm zimmînin sulbü oğlu olup şeref-i islâm ile müşerref olup zimmî iken ismi Vasil olan Receb nâm şâtır mahfil-i kazâda yine Niğde sâkinlerinden olup Dergâh-ı âlî yeniçerilerinden Derviş b. Ahmed mahzarında takrîr-i kelâm edip babam mürd-i mezbûrdan hâl-i küfrümde bana intikāl eden evden ve bahçeden ve sâir mülk ıtlâk olunup mâ-beynimizde ma‘lûm olan nesneden hisse-i şer‘iyyemiz mezbûr Derviş’e bin beş yüz akçeye bey‘ edip ve yine mürd-i mezbûrdan bana intikāl eden tarladan dahi hisse-i şer‘iyyemi sâhib-i arz ma‘rifetiyle beş yüz akçeye tefvîz edip meblağ-ı mezbûrdan dört yüz doksan akçesini nakid alıp mâ‘adâ bin beş yüz on akçesine bir Dımeşkî bıçak alıp kabz eyledim ba‘de’l-yevm varıp sâir emlâki gibi mutasarrıf olunsun dedikde mukırr-ı mezbûrun vech-i meşrûh üzre vâki‘ olan ikrâr ve mukarrun lehü’l-merkūm vicâhen ve şifâhen tasdîk edip mâ vaka‘a kayd olundu. Şuhûdü’l-hâl: Hacı Mehmed b. Hüseyin, Hasan Bey b. Abdullah, Mehmed b. Sefer ve gayruhüm