Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 307 Hüküm no: 502 Orijinal metin no: [48a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc İsa b. Veli’nin ev ve ahırı oğlu Ahmed b. İsa’ya hibe ettiği Sebeb-i tahrîr-i hurûf budur ki Kastamonu’da Cemal Ağa mahallesi sâkinlerinden Ahmed b. el-Hâc İsa nâm kimesne babası mezbûr el-Hâc İsa b. Veli nâm kimesneyi meclis-i şer‘a ihzâr ve muvâcehesinde takrîr-i da‘vâ edip babam müşârunileyh el-Hâc İsa karındaşım Mustafa’yı everip ve beni sünnet ettirdiği zamânda ki altı yıl vardır Üsküdar’da vâki‘ Çavuş mahallesi demekle ma‘rûf mahallede iki tarafı tarîk-i âm ve bir tarafı Serrâc hânı ve bir tarafı Pervâne mülkü ile mahdûd dört bâb odayı altında ahırı ve cemî‘ tevâbi‘ ve levâhıkıyla ben sagīr iken bana hibe ve temlîk edip ve yine benim için kabz etmişdir hâlâ bâliğ oldum evlerim taleb ederim deyicek gıbbe’s-suâl mezbûr el-Hâc İsa zikr olunan odalar mülkümdür hibe eylemedim deyu cevâb verip müdde‘î-i mezbûrdan da‘vâsına muvâfık beyyine taleb olundukda udûl-i ricâlden el-Hâc Mehmed b. Ramazan ve el-Hâc Hüseyin b. Mehmed nâm kimesneler hâzırân olup fi’l-vâki‘ merkūm el-Hâc İsa, mezbûr Ahmed’e sagīr iken sünnet ettirdiği zamândaki altı yıl vardır zikr olunan odaları altında ahırı ve cemî‘ tevâbi‘ ve levâhıkıyla hibe ve temlîk edip yine mezbûr Ahmed için kabz eyledi deyu edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri mu‘teber görülüp mûcebiyle ilzâm olunup gıbbe’t-taleb bu vesîka-i şâriha ketb olunup yed-i tâlibe vaz‘ u def‘ olundu vakt-i hâcetde müzekkir-i mâ-cerâ ola. Tahrîren fi’l-yevmi’s-sâmin min şehri Ramazâni’l-mu‘azzam sene [min] şuhûri sene tis‘a ve tis‘în ve tis‘a-mi’e Şuhûdü’l-hâl: Hüsrev Halîfe b. el-Hâc Şaban, Mehmed b. Habîb, Ali b. Mahmud, Hasan Bey b. Abdülmennân, Hacı Mehmed b. Abdullah ve gayruhüm