Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 314 Hüküm no: 517 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin, incil okunması için Kosta v. Andriye’ye yaptırdığı evin tasarrufundaki anlaşmazlık Yani v. Yorgi nâm zimmî mahfil-i kazâda mahalle-i Ma‘mûre’den Kosta v. Andriye nâm zimmî mahzarında takrîr-i da‘vâ edip mahalle-i mezbûrede vâki‘ bir tarafı Zahriye mülkü ile bir tarafı Kürkçü Mihal ve bir tarafı Yani Neccâr mülkü ile ve bir tarafı tarîk-i âm ile mahdûd olan evi kendi akçem ile binâ eylemiş iken mezbûr Kosta tasarrufuma mâni‘ olur suâl olunsun dedikde gıbbe’s-suâl mezbûr Kosta hudûd-ı mezbûr ile mahdûd olan evi bundan akdem etrâfında ehl-i islâmdan bir ferd olmamağın ve sadâ işitilir yerde Müslüman evi olmamağın âyin-i bâtılamız üzre incil okumak için binâ eyleyiver deyu beş bin akçelik guruşların verip ve Nikola nâm zimmî beş bin akçelik altın ve guruş verip ve Yorgi Çoban bin iki yüz akçe verip bi’l-cümle on yedi bin akçe verip mezbûru mu‘temed edip binâ olunmuşdur bundan akdem mahalle-i mezbûre nâibi Mevlânâ Mehmed huzûrunda minvâl-i meşrûh üzre olduğu sâbit olup yedime hüccet-i şer‘iyye verilmişdir deyu mevlânâ-yı mezbûrun imzâsıyla mümzâ ve hatmi ile mahtûm hüccet ibrâz edip nazar olundukda mazmûn-ı merkūmun kelâmına muvâfık olup mezbûr Yani’ye zikr olunan hüccet senin huzûrunda mı oldu deyu suâl olundukda inkâr edicek mazmûn-ı hücceti isbâta târih-i kitâbdan üç gün mehil verildikde mezbûr Kosta beyyinem ihzâr ettikde gaybet edersem da‘vâm tenâkuz olup zikr olunan ev mezbûrların olup da‘vâm bir def‘a dahi istimâ‘ olunmaya deyu müddet tamâm olup mezbûr Yani gaybet edip tefahhus olundukda kat‘â bulunmak imkān olmamağın zikr olunan ev mezbûrların yedinde mukarrer kılınıp ve mâ hüve’l-vâki‘ bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Hasan b. Sâdık, Hüseyin b. Behrâm, Sefer b. Abdullah ve gayruhüm