Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 313 Hüküm no: 516 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Efendi’den kızı Nazan’a kalan hissenin tahsiline Halil ve İbrahim b. Ahmed Fakih’in vekil tayin edildikleri Budur ki Ünye kazâsından Halil ve İbrahim b. Ahmed Fakih nâm kimesne[ler] kazâ-i mezbûre kadısı Mevlânâ Veli Efendi’nin imzâsıyla mümzâ ve hatmi ile mahtûm nakl-i şer‘î ibrâz edip nazar olundukda mazmûnunda mahrûse-i Üsküdar muzâfâtından Akâbâd nâhiyesinde vefât eden Mehmed Efendi’nin kızı Nazan nâm hâtunun babasından irs-i şer‘le intikāl eden hisse-i şer‘iyyesini kıbel-i şer‘den vasî nasb olunan Hüsam Halîfe b. Mustafa nâm kimesneden da‘vâ ve kabz ve îsâle vekâletleri mastûr ve mukayyed olan mezbûrân İbrahim ve Halil mahfil-i kazâya mezbûr Hüsam Halîfe’yi ihzâr edip müvekkilemiz mezbûre Nazan’a babasından irs-i şer‘le intikāl eden hisse-i şer‘iyyesini taleb ederiz dediklerinde gıbbe’s-suâl mezbûr Hüsam Halîfe cevâb verip fi’l-hakīka mezbûre Nazan’ın vasîsi olup babası merhûm Mehmed Efendi vefât ettikde vâlidesi Hasnâ nikâhını isbât etmezden mukaddem cemî‘ muhallefâtı verese mâ-beyninde taksîm olundukda mezbûre Nazan’a bin iki yüz elli akçe akār ile nukūd cem‘an dokuz bin sekiz yüz akçe hisse ta‘yîn olunup ba‘dehû mezbûre Hasnâ iki bin dört yüz akçe nikâhını isbât edicek ba‘de’l-hesâb mezbûrenin hissesinden dört yüz akçe lâzım gelmeğin mezbûre Hasnâ’nın zevci ve vekîli olan Mehmed nâm kimesneye teslîm edip ve bir def‘a dahi mezbûr Mehmed mezbûre Hasnâ’nın kızı Nazan’a takdîr ettiği nafakayı vekâleten taleb eyledikde bin iki yüz akçe verip yedime hüccet-i şer‘iyye aldım ve bir def‘a dahi mezbûre Hasnâ tarafından mezbûr İbrahim vekâleten yine nafaka taleb edip altı yüz akçe onu dahi teslîm eyledim ve bin dört yüz elli akçenin tahsîli mümkün olmamağın yerli yerindedir yerini göstereyim ve beş bin akçe bâkī zimmetimdedir meclis-i şer‘de teslîm edeyim deyu meblağ-ı mezbûru mezbûrân İbrahim ve Halil’e teslîm eyleyip mezbûr dahi alıp kabz eyledim ve sâbıkan edâ eylediklerine dahi mukırdır makbûlümüzdür ve bâkī kalıp tahsîli mümkün olmayan akçeyi dahi yerli yerinden göstersin biz alırız ba‘de’l-yevm vekîli olduğumuz mezbûre Nazan’ın vasîyy-i mezbûr zimmetinde bir akçe ve bir habbe bâkī kalmadı dediklerinde mâ vaka‘a bi’t-taleb tahrîr olundu. Şuhûdü’l-hâl: Hüseyin b. Behrâm, Mehmed b. Behrâm, Sefer b. Abdullah ve gayruhüm