Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 318 Hüküm no: 527 Orijinal metin no: [50b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlânâ Alâaddin Efendi’nin, bahçesini Halil b. Ferid’e sattığı Budur ki Kıdvetü’l-kuzât umdetü’l-vülât Mevlânâ Alâaddin Efendi b. el-merhûm İbrahim tarafından ikrâr-ı âti’z-zikre Behrâm Bey b. Abdullah ve Mehmed Bey b. Abdullah şehâdetleriyle sâbitü’l-vekâle olan el-Hâc Sinan b. Abdullah mahfil-i kazâda bâ‘isü’l-hurûf Halil b. Mezid mahzarında ikrâr edip müvekkilim müşârunileyh efendi mahrûse-i Üsküdar mahallâtından Toygar mahallesinde vâki‘ bir tarafı bâyi‘-i mezbûr mülkü ile ve bir cânibi müşterî-i mezbûr mülkü ile ve bir cânibi diğer Halil b. Behrâm mülkü ile ve tarîk-i âm ile mahdûd olan bahçesini eşcâr-ı müsmire ve gayrı müsmire ve cemî‘ tevâbi‘ ve levâhıkıyla mezbûr Halil sekiz bin nakd râyic fi’l-vakt akçeye bey‘-i bât ile bey‘ edip teslîm-i mebî‘ ve kabz-ı semen kıldım keyfe mâ yeşâ mutasarrıf olsun dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fî evâhiri şehri Ramazâni’l-mübârek sene elf. Şuhûdü’l-hâl: Ali Bey b. Abdullah, Mehmed b. Nasûh, Mustafa b. Mehmed, Mehmed b. Behrâm, Osman b. Abdullah, Hacı Hasan b. Abdullah, Fazlı Çelebi b. Muslihiddin, Murad b. Abdullah, Halil b. Yusuf, Muttalib b. Süleyman, Mehmed b. Habîb ve gayruhüm