Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 320 Hüküm no: 532 Orijinal metin no: [50a(2)-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nurullah b. Nebi’nin aldığı borcunu Râziye bt. Mustafa’nın kocasına ödediği Râziye bt. Mustafa nâm hâtun mahfil-i kazâda Nurullah b. Nebî nâm kimesne mahzarında takrîr-i da‘vâ edip bundan akdem mezbûr Nurullah’a mudârebe tarîkiyle dört yüz sikke altın verdim idi hâlen taleb ederim dedikde gıbbe’s-suâl mezbûr Nurullah fi’l-hakīka mezbûr Râziye yedinden meblağ-ı mezbûr dört yüz altını aldım lâkin yine mezbûrenin emriyle zevci olup hâssa sarrâclardan Alican nâm kimesneye teslîm eyledim kendi dahi ol meclisde hâzıra olup benim teslîmimi kabûl eyledi ve bundan akdem zikr olunan dört yüz sikke altını Akşehir ve Ilgın kadıları huzûrunda da‘vâ edip kendi emriyle zevci mezbûr Alican’a teslîm eyleyip zimmetimde bir akçe kalmadığına yedime hüccet-i şer‘iyye dahi verilmişdir dediği bi’t-taleb tahrîr olundu yed-i tâlibe vaz‘ u def‘ olunduğu lede’l-iktizâ kāti‘-i kîl u kāl ola. Fi’t-târihi’l-mezbûr. Şuhûdü’l-hâl: Mustafa Bey el-cündî, Mustafa Çavuş Dergâh-ı âlî, Müstedâm Bey el-cündî ve gayruhüm Yevmü’s-sülesâ fî 4 Şevvâli’l-mükerrem sene elf