Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 324 Hüküm no: 545 Orijinal metin no: [51a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın, Gevher Hân Sultan’a ait sarayı kiraladığı Dürreti’l-iklîli’l-iffe Gevher Hân Sultan tarafından husûs-ı âtîye nehc-i şer‘î ile vekîl olan fahrü’l-akrân Cemşid Ağa b. Abdülmennân mahfil-i kazâda Mehmed b. Abdullah nâm kimesne mahzarında takrîr-i merâm kılıp merhûm ve magfûrun-leh el-Hâc Paşa’nın Mirahor mahallesinde vâki‘ sarayını mezbûr Mehmed icâre ile mutasarrıfdır ne vechile aldı ve ne mikdâr zamân oldu suâl olunmasın taleb eylerim dedikde gıbbe’s-suâl mezbûr Mehmed bi’l-muvâcehe cevâb verip zikr olunan sarayı kestane ve zeytin meyvesinden mâ‘adâ bahçesiyle ve cümle tevâbi‘iyle elf senesi Muharremi’nin ibtidâsından sene tamâmına değin üç bin beş yüz akçe icâreye aldım dediği mûmâileyh Cemşid Ağa talebiyle kayd olunup yed-i tâlibe vaz‘ olundu. Tahrîren fi’t-târihi’l-mezbûr. Şuhûdü’l-hâl: Ali Çelebi eş-Şâmî, Mehmed Efendi b. Karagöz, Ali b. Hızır, Hasan b. Abdullah ve gayruhüm