Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 329 Hüküm no: 557 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Âlemşah bt. Mahmud’dan kocası ve kız kardeşine kalan evin Mehmed Efendi b. Ebûbekir’e satıldığı Budur ki Bundan akdem vefât eden Âlemşah bt. Mahmud nâm hâtun zevci Mehmed ve li eb ve üm kız karındaşı Şahzaman nâm hâtun mahfil-i kazâda kıdvetü’l-kuzât umdetü’l-vülât Mehmed Efendi b. Ebûbekir mahzarında ikrâr ve takrîr-i kelâm edip mezbûreden bize irs-i şer‘le intikāl eden mahalle-i Gerede’de vâki‘ bir cânibi Baba Kemal mülkü ile ve bir cânibi Ali b. Abdullah mülkü ile ve bir cânibi tarîk-i hâs ve bir cânibi tarîk-i âm ile mahdûd olan iki bâb tahtânî ve bir bâb fevkānî evleri ve sofayı ve kuyuyu ve eşcâr-ı müsmire ve gayrı müsmireyi müştemil olan mülk menzilimizi cemî‘ tevâbi‘ ve levâhıkıyla mezbûr Mehmed Efendi’ye kırk bin sekiz yüz kırk akçeye bey‘-i bât ile bey‘ edip teslîm-i mebî‘ ve kabz-ı semen kıldım keyfe mâ yeşâ mutasarrıf olsun dediklerinde mukırrân-ı mezbûrânın vech-i meşrûh üzre vâki‘ olan ikrârlarını mezbûr Mehmed Efendi vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fî evâsıtı şehri Şevvâli’l-mükerrem sene elf. Şuhûdü’l-hâl: Mahmud Halîfe el-hatîb, kıdvetü’ş-şuyûh eş-Şeyh Mehmed Efendi, Mustafa b. Mehmed, Mehmed Çelebi b. Ahmed el-cündî ve gayruhüm