Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 336 Hüküm no: 573 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Mihal’in, Todoro Nikola’dan alacağının tahsil ettiği Oldur ki Manol v. Mihal nâm zimmî mahfil-i kazâda Todoro Nikola mahzarında takrîr-i da‘vâ kılıp mezbûr Todoro’da bin akçe gemi navlunundan ve yedi yüz elli akçe karzdan cem‘an bin yedi yüz elli akçe hakkım vardır taleb ederim dedikde gıbbe’s-suâl mezbûr Todori cevâb verip gemiyi sekiz yüz akçeye kavl eyledim dedi yüz elli karz akçeyi almadım ve gemisini kereste ile yükletip ben yabanda iken gemisini alıp benim kerestemi varıp sattı dedikde müdde‘î-i mezbûr dahi bi’l-muvâcehe gemiyi kendi yükleyip geminin içine girip gelip bunda iskelede boşalttı navlunu husûsuna ve karz verdiğim yedi yüz elli akçeye bu gemi kerestesini kefîl bulduğuna şâhidlerim vardır dedikde Yorgi v. Mihal ve Duka v. Dimitri nâm zimmîler meclis-i şer‘a li ecli’ş-şehâde hâzırân olup merkūm Todoro mezbûr Manol’dan yedi yüz elli akçe karz ve bin akçeye gemi navlunu kavl edip cem‘an bin yedi yüz akçe lâzımü’l-edâ deynimdir ve tuttuğu geminin içine bizim ile bile girip gelip bunda kerestesini kendi boşalttı biz bu husûsa şâhidleriz şehâdet dahi ederiz dediklerinde şehâdetleri hayyiz-i kabûlde vâki‘ oldukdan sonra mâ vaka‘a kayd olundu. Şuhûdü’l-hâl: Mustafa Çelebi, Hasan b. Hamza, Hasan b. Sâdık, Mustafa b. Mehmed, el-Havâle ve gayruhüm Yevmü’l-erbi‘â et-tâsi‘ aşer min Şevvâli’l-mükerrem li sene elf