Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 339 Hüküm no: 581 Orijinal metin no: [54b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Bey b. Hasan Bey’in, Cadir Çavuş’a borçlu olduğu Diyarbekir Eyâletine tâbi‘ Palu hâkimi olan kıdvetü’l-ümerâi’l-kirâm umdetü’l-küberâi’l-fihâm Süleyman Bey b. Hasan Bey tarafından husûs-ı âtîye Osman b. Maksud ve İbrahim b. Hızır Bey şehâdetleriyle vekâleti sâbite olan fahrü’l-akrân kethüdâları olan Mehmed Bey b. Ahmed mahfil-i kazâda Dergâh-ı âlî çavuşlarından fahrü’l-akrân Çavuş b. Abdülmennân mahzarında ikrâr ve takrîr-i merâm kılıp müvekkilim mûmâileyh Süleyman Bey mezbûr Câdir Çavuş’dan yüz bin akçe nakid ve dahi târih-i kitâbdan yüz seksen gün mehil ile ve elli bin akçeye iki donluk samur kürk ve elli bin akçeye üç âdet gümüşlü raht ve iki kemer kılıç ki cem‘an iki yüz bin akçe ki guruş yetmiş ve filori yüz yirmişer hesâbı üzre lâzımü’l-edâve vâcibü’l-kazâ deyndir deyip ve yine Palu hâkimi olan kıdvetü’l-ümerâi’l-kirâm mûmâileyh Süleyman Bey’in ammizâdesi olan Ahmed Bey b. Devlet Şah ve Memi Şaban b. Yusuf ve Mustafa Subaşı b. Veled ve mezbûr Mehmed Bey meblağ-ı mezbûr iki yüz bin akçeye biz kefîl olduk dediklerinde mukırrûn-ı mezbûrunun vech-i meşrûh üzre vâki‘ olan ikrârlarını mukarrun lehü’l-merkūm Câdir Çavuş vicâhen tasdîk ve tahkīk eylediği kayd olundu. Şuhûdü’l-hâl: Fahrü’l-cüyûş Ahmed Çavuş, İsmail Efendi el-müderris, Pîr Ahmed b. Ali, Hüseyin Subaşı b. Abdullah, Mehmed b. Ali, Şaban b. Abdullah, Musa Bey b. Şaban, Mehmed Bey [b.] Sinan, Mehmed b. er-râcil ve gayruhüm Yevmü’l-isneyn fî 25 Şevvâli’l-mükerrem