Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 339 Hüküm no: 580 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Attâr Hacı Mehmed Vakfı’na ait yanan dükkan yerinin, Avraham v. Mosi ve Baroh’a mukâtaaya verilmesi Budur ki Merhûm Attâr Hacı Mehmed evkāfına bi’l-fi‘l mütevellî olan Hasan b. Sâdık mahfil-i kazâda bâ‘isü’l-kitâb Avraham v. Mosi nâm Yahudi mahzarında takrîr-i kelâm edip mahmiye-i İstanbul’da Mahmud Paşa kurbunda Hacı Küçük mahallesinde vâki‘ bir cânibi Şahhuban vakfıyla ve iki cânibi yine vakf-ı mezbûr dükkânları yeriyle ve bir tarafı tarîk-i âm ile mahdûd olup ihrâk olunan bir bâb dükkânı üstünde odasıyla mezbûr Yahudi yanmazdan mukaddem ayda on beşer akçe icâre ile mutasarrıf iken ihrâk vâki‘ olup zikr olunan dükkân yanıp be-tekrâr binâya vakfın müsâ‘adesi olmamağın zikr olunan dükkânın yerini havlu kapısı ve merdiven yeri ve odunhânesi ve kuyusu Baroh nâm Yahudi ile müşterek olmak üzre mezbûr Avraham’a dokuz yüz doksan yedi Recebi’nin gurresinde doksan yıl tamâmına değin her sene ikişer yüz akçe mukāta‘aya vakfa enfa‘ olmağın vermiş idim beher sene vakfa ta‘yîn olunan ikişer yüz akçe mukāta‘ayı edâ ettikden sonra tasarrufuna kimesne mâni‘ olmaya dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Şuhûdü’l-hâl: Maksud Çelebi b. Murad, Mustafa b. Mehmed, Musli Çelebi Macûnî, Mehmed b. Behrâm ve gayruhüm