Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 341 Hüküm no: 583 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Ağacan’ın eşyalarını alanlara açtığı davalardan anlaşarak vazgeçtiği Budur ki Emîrü’l-ümerâi’l-kirâm Mahmud Çavuş hazretleri cânibinden ve âdemlerinden Çâker Ağa ve Zeynel Ağa ve Mustafa Kethüdâ ve Yayabaşı Mustafa ve Mehterbaşı Takok Subaşı ve Hüseyin Çavuş nâm kimesneler câniblerinden vekîl-i şer‘î olan kıdvetü’l-emâsil ve’l-akrân Hasan Bey mahzarında mahfil-i kazâda vilâyet-i Şehr-i Zol’dan el-Hâc Ali b. Ağacan nâm kimesne vekîl-i mezbûr mahzarında ikrâr edip bundan akdem müşârunileyh hazretleri ve Çâker Ağa ve Zeynel Ağa hilâf-ı şer‘-i şerîf akçe ve esbâbım aldılar deyu da‘vâ eylemiş idim beyyineden âciz olduğumuzdan gayrı muslihûn tavassut edip beş kırmızı altına ibrâ’ ve ıslâh edip husûs-ı merkūm için müşârunileyhin ve mezbûrânın zimmetlerini ibrâ’-i âm ile [ibrâ] eyledim ba‘de’l-yevm [da‘vâ] edersem lede’l-hükkâm istimâ‘ olunmaya deyip ve Şehr-i Zol’dan dîvân çavuşlarından Ferhad Bey b. Hüsam vekîl-i mezbûr mahzarında ikrâr edip mezbûr Mustafa Kethüdâ ve Sarbanbaşı Mustafa ve Mehterbaşı Takok Subaşı ve sâir âdemleri bî-vech akçe ve esbâbım almışlardır deyu da‘vâ eylemiş idim hâlâ beyyineden âciz olduğumdan gayrı muslihûn tavassut edip bir hil‘at ve bir sikke kırmızı altına ibrâ’ ve ıslâh edip mezbûrunun zimmetlerini husûs-ı mezbûr için ibrâ’-i âm ile ibrâ’ eyledim deyip ve vilâyet-i mezbûreden Çavdar Kethüdâ dahi ikrâr edip bundan akdem mezbûr Sarbanbaşı Mustafa ve Hüseyin Çavuş ve Hacı Subaşı ve sâir yoldaşları bî-vech akçe ve esbâbım aldılar deyu da‘vâ ve nizâ‘ eylemiş idim hâlâ muslihûn tavassut edip altı kırmızı altına ibrâ’ ve ıslâh edip mezbûrunun zimmetlerini ibrâ’-i âm ile ibrâ’ eyledim deyip ve Şeyh Uryan b. eş-Şeyh Veli nâm kimesne dahi vekîl-i mezbûr mahzarında ikrâr edip bundan akdem mezbûr sarbanbaşı ve müşârunileyh paşanın âdemleri nice akçe ve esbâbım almışlardır deyu da‘vâ ve nizâ‘ eyleyip beyyineden âciz olduğumdan gayrı muslihûn on bir kırmızı altına ibrâ’ ve ıslâh edip müşârunileyhin ve mezbûr sarbanbaşının zimmetlerini ibrâ’-i âm ile [ibrâ’] eyledim ba‘de’l-yevm [da‘vâ] edersem lede’l-hükkâm istimâ‘ olunmaya dedikde mukırrûn-ı mezbûrunun vech-i meşrûh üzre vâki‘ olan ikrârlarını vekîl-i merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Fî evâhiri Şevvâli’l-mükerrem sene elf. Şuhûdü’l-hâl: Yahya Çavuş an Dergâh-ı âlî, Mehmed Çavuş Mirmîrân, Feridun Çavuş, Hüseyin Bey el-bevvâb, Mehmed Ağa ve gayruhüm