Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 342 Hüküm no: 584 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Bey b. Abdüsselâm’ın mukâtaaya verdiği has köylerinden hakkını alamadığı Sâbıkan Çorum sancağı beyi kıdvetü’l-ümerâi’l-kirâm Yusuf Bey b. Abdüsselâm mahfil-i kazâda vilâyet-i merkūmeden Ömer Çelebi b. Hüseyin mahzarında takrîr-i da‘vâ kılıp mezbûr Ömer Çelebi üç kimesne ile dahi kendi hâslarım olan karyeleri iki yüz kırk beş müd terekeye ikisi buğday biri arpa olmak üzre alıp bana hakkım vermediler şer’le taleb eylerim dedikde gıbbe’s-suâl mezbûr Ömer Çelebi cevâb verip dört âdem zikr olunan hâsları iki yüz kırk beş müd terekeye ikisi buğday ve biri arpa olmak üzre aldım velâkin ben kendi hissemi verip bana teslîm tezkeresi verdi deyu kendi mührüyle mahtûm ve imzâsıyla mümzâ teslîm tezkeresi ibrâ’ edip bu tezkere senin midir deyu suâl olundukda tezkere benimdir ammâ Mahmud Paşa bunlara buğday husûsuna kefîl olmuşdur benim teftîşime emr çıkarıp beni tahvîf eylediler ben dahi mükrehen çıkarıp bu tezkereyi verdim deyu ikrâr ve i‘tirâf eylediği kayd olundu Şuhûdü’l-hâl: Mahmud b. Haydar, Ali Beşe b. Mustafa, Hasan b. Sefer, Fazlı b. Mehmed, Hasan b. Celal, Sefer b. Abdullah ve gayruhüm