Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 344 Hüküm no: 591 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın kazâen Ali b. Şahverdi’yi bıçakla yaraladığı Budur ki Hüseyin b. Hasan cânibinden vekîl-i şer‘î olan Hasan Bey b. Abdullah mahfil-i kazâda takrîr-i kelâm edip bundan akdem müvekkilim mezbûr Hüseyin kıdvetü’l-ümerâi’l-kirâm Ecârim beyi olan Üveys Bey âdemlerinden Ali b. Şahverdi nâm kimesneyi hatâ’en hançer ile vurup mecrûh eylemiş idi hâlen mezbûr Ali Bey iki yüz akçe alıp mezbûr Hüseyin’in zimmetini ibrâ’-i âm ile ibrâ’ eyledi lâkin mahkemeye gelmeğe iktidârı yokdur üzerine varılıp vukû‘ı üzre sicil olunmasını taleb ederim dedikde Mevlânâ Ahmed irsâl olunup zeyl-i kitâbda ismi mastûr olan Müslümanlar ile vardıklarında mezbûr Ali vekîl-i merkūm Hasan Bey mahzarında ikrâr ve i‘tirâf edip mezbûr Hüseyin bundan akdem hançer ile karnımdan vurup mecrûh eylemiş idi hâlen mezbûrdan bin iki yüz akçe merhem bahâ alıp husûs-ı mezbûr için mezbûrun zimmetini ibrâ’-i âm ile ibrâ’ eyledim ba‘de’l-yevm husûs-ı mezbûr için benden veya vekîlimden da‘vâ sâdıra olursa lede’l-hükkâm istimâ‘ olunmaya dediğini mevlânâ-yı mezbûr haber vermeğin bu hurûf tahrîr olundu. Tahrîren fî evâhiri Şevvâli’l-mükerrem sene elf. Şuhûdü’l-hâl: İsmail b. Kasım, Üstâd Mehmed, Müstedâm Bey el-cündî, Bayezid b. Mehmed, Mehmed b. Abdullah ve gayruhüm