Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 345 Hüküm no: 592 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ağa olamayan yeniçeri ağası Hasan’ın, Mahmud Paşa’ya, verdiği paraları geri istemesi Hâlâ Maraş Beylerbeyiliği’nden munfasıl olan emîrü’l-ümerâi’l-kirâm Mahmud Paşa -dâme ikbâluhû- tarafından vekîl-i şer‘î olan kıdvetü’l-emâsil ve’l-akrân Hasan Bey ez-zaîm mahzarında Şehr-i Zol’da bi’l-fi‘l yeniçeriyân-ı yesâr ağası olan fahrü’l-akrân Hasan Ağa b. el-merhûm Mirzâ Ağa mahfil-i kazâda ikrâr ve i‘tirâf [edip] bundan akdem üzerimde olan ağalık husûsiçin altmışar hesâbı üzre bin yüz altınım alıp ağalık müyesser olmayıp zimmetinde kalmış idi hâlâ iki yüz elli sikke altın ki cem‘an otuz bin akçe olur ve altı bin akçe kıymetli bir at ve bir katır vermeğin gümüşlü raht ve bir kırmızı yüz çile siyah tavşan kürkü kaplı ferâce ve bir hançer kabzası ve bir şalvar cem‘an altmış altı bin akçeyi müşârunileyh Mahmud Paşa yedinden bi’t-tamâm alıp kabz edip husûs-ı mezbûr için zimmetini ibrâ’-i âm ile ibrâ’ eyledim dedikde mukırr-ı mezbûrun vech-i meşrûh üzre vâki‘ olan ikrârını vekîl-i mezbûr vicâhen ve şifâhen tasdîk edip mâ vaka‘a bi’t-taleb tahrîr olundu Şuhûdü’l-hâl: Yahya Çavuş Dergâh-ı âlî, Kurd Efendi b. Şaban el-müderris, Abdullah Çelebi b. Veliyyüddin, Mustafa Ağa b. Mehmed, Ömer Ağa b. Abdullah ve gayruhüm