Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 351 Hüküm no: 607 Orijinal metin no: [57b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in, Tesova’nın timarını İbrahim Bey b. Mahmud’a parasını aldığı, timar arâzisini vermediği için parayı geri ödemesi Budur ki İbrahim Bey b. Mahmud mahfil-i kazâya Dergâh-ı âlî çavuşlarından fahrü’l-akrân Mustafa Çavuş mübâşeretiyle Paşa sancağında Nevrekob nâhiyesinde Tesova nâm karye ve gayride altı bin akçe tîmara mutasarrıf olan Mehmed Bey b. Abdullah nâm kimesneyi ihzâr ve mahzarında takrîr-i da‘vâ edip bundan akdem tîmar-ı mezbûr husûsiçin Hüsrev nâm kimesne ile Mehmed nâm kimesneyi vekîl edip mezbûr Hüsrev yediyle iki yüz seksen kırmızı altın verilmiş idi hâlâ ne tîmarı ve ne akçemi verir taleb ederim dedikde gıbbe’s-suâl mezbûr fi’l-hakīka mezbûrân kimesneler tîmar-ı mezbûr için bir mikdâr akçe getirdiler lâkin almadım haberim yokdur dedikde udûl-i müslimînden Mehmed b. Abdullah ve Mehmed b. Nasûh nâm kimesneler edâ-yı şehâdet edip fi’l-hakīka mezbûr Hüsrev zikr olunan iki yüz seksen kırmızı altını mezbûr Mehmed Bey’e tîmar husûsiçin teslîm edip mezbûr dahi alıp kabz eyledi bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mübâşir-i mezbûr Mustafa Çavuş ve Yusuf b. Abdullah ve Hamza b. Abdullah nâm kimesneler dahi dünkü gün mezbûr Mehmed Bey bizim huzûrumuzda mebî‘-i mezbûrun yüz elli kırmızı altını durur yüz otuz altını harc eyledim beni ıslâh eylen dedi biz dahi bu husûsa şâhidiz şehâdet dahi ederiz dediklerinde mâ vaka‘a bi’t-taleb tahrîr olundu. Fî evâhiri Şevvâli’l-mükerrem sene elf. Şuhûdü’l-hâl: Mehmed Bey [b.] Ali, Müstedâm Bey el-cündî, Mehmed Subaşı an zümre-i yayabaşıyân-ı hâssa, Muttalib b. Süleyman ve gayruhüm