Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 352 Hüküm no: 608 Orijinal metin no: [57b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey ile kız kardeşi Banu Kadın’a babalarından kalan çayırın satılması Kıdvetü’l-emâcid ve’l-a‘yân Mehmed Bey b. el-merhûm Ahmed Ağa asâleten ve li eb ve üm karındaşı fahrü’l-muhadderât tâcü’l-mestûrât Banu Kadın tarafından vekâleten mahfil-i kazâda bâ‘isü’l-hurûf Dergâh-ı âlî çavuşlarından kıdvetü’l-emâsil ve’l-akrân Bâli Çavuş b. Hamza mahzarında ikrâr ve takrîr-i kelâm edip müvekkilem mezbûre Banu ile bana babamızdan irs-i şer‘le intikāl eden mahrûse-i Üsküdar mahallâtından Hasan Paşa mahallesinde vâki‘ bir tarafı Mehmed Çavuş b. Hayreddin çayırıyla ve bir tarafı benim çayırım ile ve bir tarafı tarîk-i âmla ve bir tarafı mezâr ve saray yoluyla mahdûd ve mümtâz olan Kazgâni Bağı demekle ma‘rûf bir kıt‘a çayırı içinde eşcâr-ı müsmire ve gayrımüsmiresiyle ve kuyusuyla ve suyu ile bi cümleti’l-hudûd ve kāffeti’l-hukūk mezbûr Bâli Çavuş’a yirmi bin nakid akçeye bey‘ edip teslîm-i mebî‘ kıldım ve semeninden on üç bin üç yüz otuz iki akçe ve otuz iki mankurumu aldım ve hemşîrem ve müvekkilem hissesinden altı bin altı yüz altmış altı akçe ve on altı mankur kaldı deyicek müşterî-i mezbûr fi’l-hakīka bey‘-i mesfûr minvâl-i mezbûr üzre vâki‘ olup kendi akçesin verdim lâkin çayırını müvekkilesi gelip kabza veya bey‘a inkâr ede vekâleti isbât eylesin deyicek Ali b. Mustafa ve Hasan b. Gazanfer nâm kimesneler mezbûre Banu Hâtun mezbûr Mehmed Bey hissesin bey‘a ve semenini kabza vekîl ile şâhidleriz şehâdet ederiz dediklerinde şehâdetleri hayyiz-i kabûlde vâki‘ olup mûcebiyle hükm olunup müvekkilesinin semenden hissesin dahi bi’t-tamâm alıp kabz ettikden sonra sıhhat-ı bey‘a ve şirâya hükm olunup ve mâ hüve’l-vâki‘ tahrîr olundu. Şuhûdü’l-hâl: Fahrü’l-akrân Ali Çelebi el-kâtib, Mehmed Reis b. Hüsam, Mustafa b. Bâli, Kıdvetü’l-akrân Sünbül Ağa et-Tavâşî, Mefharü’l-akrân Süleyman Bey b. Abdurrahman, Cafer Ağa ez-zaîm, Davud b. Hüseyin, Mehmed b. Mustafa, Ali Çelebi b. Mehmed, Şaban Bey Altıncı ve gayruhüm