Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 354 Hüküm no: 613 Orijinal metin no: [58a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Çavuş b. Hüseyin’in kölesi olduğunu iddia ettiği Mehmed b. Abdullah’ın âzatlı olduğu Şehzâde-i civân-baht -tâle bekāhu- hazretlerinin çakırcıları çavuşu olan Musa Çavuş b. Hüseyin mahfil-i kazâya bâ‘isü’l-hurûf orta boylu, kara sakallı, sol elinin baş parmağı maktû‘ ve iki ayağı mu‘avvec ve elinin üstünde eser-i cerâhati olan Mehmed b. Abdullah nâm Arab’ı ihzâr ve mahzarında takrîr-i da‘vâ edip merkūm Arab benim abd-i memlûküm iken ibâk etmiş idi hâlen bunda buldum suâl olunup vukû‘ı üzre sicil olunmasın taleb ederim dedikde gıbbe’s-suâl mezbûr Mehmed cevâb verip vilâyet-i Anadolu’da Akşehir kazâsına tâbi‘ Küçük Tohoma? nâm karye sâkinlerinden el-Hâc Ömer b. Yusuf nâm kimesnenin kulu olup Ka‘be-i Mu‘azzama’ya giderken müdebber-i mutlak edip bi emrillâhi te‘âlâ yolda vefât ettikde âzâd oldum dedikde mezbûr Mehmed’den takrîrine muvâfık beyyine taleb olundukda udûl-i müslimînden Hızır b. Abdurrahman ve Mehmed b. Musa Fakih nâm kimesneler edâ-yı şehâdet-i şer‘iyye edip fi’l-hakīka târih-i kitâbdan on yıl mikdârı vardır mezbûr el-Hâc Ömer Ka‘be-i Mükerreme’ye müteveccih oldukda işbu evsâf ile mevsûfe olan Mehmed nâm kulum müdebber olup ben vefât ettikde âzâd olsun dedi ve mezbûre bi emrillâhi te‘âlâ yolda vefât etti bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olundukdan sonra mezbûr Mehmed’in ıtkına hükm olunup ve mâ hüve’l-vâki‘ bi’t-taleb tahrîr olundu. Şuhûdü’l-hâl: Veli b. Habîb, İlyas Bey [b.] Hızır, Ramazan b. Abdullah, Kaytas b. Abdullah, Lütfullah Çelebi [b.] Budak ve gayruhüm