Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 359 Hüküm no: 624 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in, evini Mustafa b. Abdullah’a sattığı Oldur ki Mehmed b. Ahmed nâm kimesne mahfil-i kazâda işbu Mustafa b. Abdullah mahzarında ikrâr ve takrîr-i merâm kılıp Kefçe mahallesi dâhilinde yine benim ve bir Cafer b. Pîrdede ve Sâdık b. Kara Hasan mülkleriyle ve tarîk-i âmla mahdûd üç fevkānî odayı ve iki ahırı ve kuyuyu ve tahtânî odayı ve havluyu müştemil olup bundan akdem mezbûr Cafer merkūm Mustafa’ya bey‘ eyledikde hakk-ı şuf‘am olup da‘vâ eylediğimde şer‘le bana hükm olup mülk menzilimi cümle tevâbi‘ ve levâhıkıyla mezbûr Mustafa’ya otuz iki bin nakid akçe ile bir kabza adedi nâ-ma‘lûm fülûsa bey‘-i bâtt-ı sahîh-i şer‘î birle bey‘ edip kabz-ı semen ve teslîm-i mebî‘ kıldım dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr vicâhen ve şifâhen tasdîk eylediği üzre kayd olundu. Şuhûdü’l-hâl: İlyas Bey b. Abdullah el-cündî, Ahmed Bey b. Abdullah el-cündî, Rüstem Bey b. Abdullah el-cündî, Budak b. Ahmed, Mehmed Bey b. Ahmed, Mehmed b. Abdullah, Bâli Hoca b. Pîr Kadem, Hasan b. Hamza, Mahmud Bey b. Abdullah er-râcil, Mehmed b. Memi ve gayruhüm