Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 367 Hüküm no: 641 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ali’nin hayatta iken Ali b. Mustafa’ya verdiği borcu, Ali’nin oğlunun vasisi Ali b. Sinan’ın tahsil ettiği Budur ki Mahrûse-i Üsküdar sâkinlerinden olup bundan akdem vefât eden Ali nâm kimesnenin sagīr oğlu Mehmed’e kıbel-i şer‘den vasî olan Ali b. Sinan mahfil-i kazâya bâ‘isü’l-kitâb diğer Ali b. Mustafa’yı ihzâr ve mahzarında takrîr-i da‘vâ edip vasî olduğum yetîmin babası mezbûr Ali hâl-i hayâtında mezbûr Ali’ye karz tarîkiyle bin yedi yüz akçe verip vefât ettikde zimmetinde kalmışdır vesâyetim hasebiyle taleb ederim dedikde gıbbe’s-suâl mezbûr Ali fi’l-hakīka müteveffâ-yı mezbûr bana bin yedi yüz akçe vermiş idi lâzımü’l-edâ deynimdir deyu ikrâr edip meblağ-ı mezbûru mahfil-i kazâda vasîyy-i merkūma bi’t-tamâm teslîm edip mezbûr dahi alıp kabz eyledim meblağ-ı mezbûrdan zimmetinde bir akçe bâkī kalmadı dedikde mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Hasan Bey el-cündî, Hasan b. Sâdık, Mehmed b. Behrâm, Muttalib b. Süleyman ve gayruhüm