Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 371 Hüküm no: 651 Orijinal metin no: [61b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. el-Hâc Nasûh’un, İsmail b. Abdullah’tan at satın aldığı Budur ki El-Hâc Ahmed [b.] el-Hâc Nasûh mahfil-i kazâya İsmail b. Abdullah nâm kimesneyi ihzâr ve mahzarında takrîr-i da‘vâ edip mezbûr İsmail bundan akdem vilâyetimizde subaşı oldukda cebren bir kula yeli pürçek ak bir atımı aldı taleb ederim dedikde gıbbe’s-suâl mezbûr İsmail zikr olunan atı mezbûrdan Müslümanlar mahzarında yirmi altına aldım ve akçelerini bi’t-tamâm teslîm eyledim şâhidlerim vardır dedikde udûlden Memi b. Abdullah ve Hüseyin b. Abdullah nâm kimesneler edâ-yı şehâdet-i şer‘iyye edip fi’l-hakīka mezbûr el-Hâc Ahmed da‘vâ eylediği atı bizim huzûrumuzda mesfûr İsmail’i yirmi altına bey‘ edip ve akçesini bi’t-tamâm alıp kabz eyledi bu husûsa şâhidleriz şehâdet dahi ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Ahmed Bey [b.] Abdullah el-cündî, İlyas Bey el-cündî, Muttalib b. Süleyman ve gayruhüm