Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 372 Hüküm no: 655 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad b. Yusuf’un paralarını zorla aldığı gerekçesiyle dava ettiği Mustafa Bey’le anlaştıkları Oldur ki Beyşehri kazâsında Yağlı Baya nâm karye sükkânından Murad b. Yusuf meclis-i şer‘de Birecik sancağından munfasıl olan iftihârü’l-ümerâi’l-kirâm Mustafa Bey tarafından tasdîk-i âtîye nehc-i şer‘iyle vekâleti sâbite olan Mehmed b. Hasan mahzarında ikrâr ve takrîr-i kelâm eyledi ki mezbûr Murad müvekkilim müşîr-i müşârunileyhden zulmen yedi bin akçem aldın deyu da‘vâ ve taleb etmiş idi hâlâ ikrârı üzre dört bin akçeye bir re’s at ve bir re’s seyishâne ve bir mikdâr çuka verip husûs-ı mezbûr ve sâir zimmetinden ibrâ’-i âm ile ibrâ’ ve iskāt-ı tâm ile iskāt ve terk ve da‘vâ eyledim deyicek vekîl-i merkūm dahi bi’l-muvâcehe mukırr-ı mezbûru ikrâr-ı meşrûhundan tasdîk edip mâ vaka‘a gıbbe’l-iltimâs tahrîr ve terkîm olundu ki lede’l-iktizâ kāti‘-i kîl u kāl ola. Cerâ zâlike ve hurrire fî evâsıtı Zilka‘deti’l-harâm li sene elf mine’l-hicreti’n-nebeviyye. Şuhûdü’l-hâl: Muttalib b. Süleyman, Ertuğrul b. Şaban en-Nâzır, Süleyman b. Mahmud, Ferhad Bey b. Abdullah ve İsa Efendi el-kadı ve gayruhüm mine’l-hâzırîn