Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 373 Hüküm no: 656 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eşi Hasan Bâli b. Hüdaverdi ile tekrar evlenen, Tâci Hâtun bt. Ahmed Çelebi çocukları için nafaka ve kisve bedelinden vazgeçtiği Oldur ki Uluborlu’da sâkine olan fahrü’l-mestûrât Tâci Hâtun bt. Ahmed Çelebi mahfil-i kazâda zevci olan Hasan Bâli b. Hüdaverdi mahzarında ikrâr ve takrîr-i kelâm ve i‘tirâf ve ta‘bîr-i merâm kılıp eyledi ki işbu mezbûr zevcim Hasan Bâli sâbıkan bana talâk verdikde kızım Saime’yi nafaka almak üzre kabûl edip Mahmud nâm sagīr oğlum izn-i şer‘-i şerîf ile nafaka takdîr ettirmiş idim hâlâ mezbûr Hasan Bâli ile yine beynimizde akd-i nikâh vâki‘ olmağın mezbûr Mahmud için takdîr olunan nafaka ve kisve bahâ ve sâir zevciyyete müte‘allik olan da‘vâdan ve kız için de nafaka talebinden fâriğa olup zevcim Hasan Bâli’nin zimmetini ibrâ’-i âm ile ibrâ’ ve iskāt-ı tâm ile iskāt ettim ba‘de’l-yevm benden veya vekîlimden husûs-ı mezbûra müte‘allik da‘vâ ve taleb sâdır olursa lede’l-hükkâmi’l-kirâm makbûle ve mesmû‘a olmasın deyicek mukırr-ı mezbûreyi ikrâr-ı meşrûhunda mukarrun lehü’l-mesfûr bi’l-muvâcehe tasdîk ve tahkīk edip mâ vaka‘a bi’t-taleb kayd-ı sicil şud. Tahrîren fi’t-târihi’l-mezbûr. Şuhûdü’l-hâl: Nefeszâde Efendi el-müderris, Muslihiddin Efendi el-müderris, Ahmed Efendi el-müderris, Mevlânâ Muslihiddin Efendi el-kadı, Abdurrahman Çelebi b. Hacı Çelebi, Mevlânâ Selâmi Efendi el-kadı, Muttalib b. Süleyman, Hasan b. Sâdık, Şemseddin b. Sâdık ve gayruhüm mine’l-hâzırîn Yevmü’s-sülesâ fî 16 Zilka‘deti’l-harâm sene elf