Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 376 Hüküm no: 661 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Şiro v. Şirilu ile Rebizo v. Yani’nin ortaklıktan ayrıldıkları Vilâyet-i Rum’da Fenar kazâsına tâbi‘ Graniçe nâm karyeden olup hâlâ mahrûse-i Üsküdar’da sâkin olan Apostol v. Şiro v. Şirilu nâm zimmî mahfil-i kazâda bâ‘isü’l-kitâb Rebizo v. Yani nâm zimmî mahzarında ikrâr ve takrîr-i merâm edip mezbûr Apostol bundan akdem benim şerîkim olup birbirimiz ile hesâblaşıb bana âid olduğu alıp kabz edip evime götürdüm mezbûrda bir akçe ve bir habbe hakkım yokdur ferâcemde bir mikdâr galle vardır mürd olursam mezbûru kimesne rencîde etmeye dedikde mukırr-ı mezbûrun vech-i meşrûh üzre vâki‘ olan ikrârını Apostol dahi vicâhen tasdîk ve şifâhen tahkīk ettikden sonra sûret-i hâl gıbbe’l-ibtigā sicil olundu. Fî evâsıtı Zilka‘de li sene elf. Şuhûdü’l-hâl: Mustafa Bey b. Abdullah, Mehmed b. Behrâm, Muttalib b. Süleyman, Mehmed b. Mustafa, Mustafa b. Mehmed