Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 378 Hüküm no: 667 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in, Ayşe Hâtun bt. Mustafa Paşa’dan aldığı borca karşılık rehin verdiği ev hüccetini geri istemesi Budur ki Canik beyi olan fahrü’l-ümerâi’l-kirâm Hasan Bey tarafından vekîl olup vekâleti Murad Kethüdâ b. Abdullah ve Ali b. Hacı Bektaş şehâdetleriyle sâbitü’l-vekâle olan Selim Kethüdâ mahfil-i kazâda hâlâ Gazze beyi olan iftihârü’l-ümerâi’l-kirâm muhtârü’l-küberâi’l-fihâm Mustafa Bey hazretleri tarafından vekîl olup vekâleti Süleyman Bey [b.] Abdullah ve Mehmed b. Abdullah şehâdetleriyle sâbit olan Mustafa Bey [b.] Abdullah mahzarında takrîr-i da‘vâ edip bundan akdem müvekkilim müşârunileyh Hasan Bey mûmâileyh Mustafa Bey Ayşe Hâtun bt. el-merhûm Mustafa Bey’den altmış bin akçe alıp mukābelesinde zevcesi fahrü’l-muhadderât tâcü’l-mestûrât Ayşe Hâtun bt. el-merhûm Mustafa Paşa’nın hâric-i Galata’da Beşiktaş nâm mevzi‘de Sinan Paşa binâ eylediği câmi‘-i şerîf kurbunda bir tarafı Ayşe Hâtun mülkü ile ve bir tarafı câmi‘-i mezbûr ile ve bir tarafı Kayid Hasan mülkü ve bir tarafı tarîk-i âm ile mahdûd olup büyût-ı müte‘addideyi müştemil olan mülk evinin hüccetini rehin vaz‘ etmiş idi hâlâ meblağ-ı mezbûru bi’t-tamâm teslîm edip hücceti taleb eyledikde te‘allül eder vekîl-i mezbûrdan suâl olunup vukû‘ı üzre sicil olunmasın taleb ederim dedikde gıbbe’s-suâl mezbûr Mustafa fi’l-hakīka mezbûrun müvekkili müşârunileyh Hasan Bey’den benim müvekkilim Mustafa Bey altmış bin akçeyi verdikde mukābelesinde zikr olunan ol hüccetini rehin almış idik lâkin meblağ-ı mezbûr mûmâileyh Hasan Bey’den bi’t-tamâm alıp kabz ettikde hücceti tecessüs edip bulmadı zâyi‘ olmuş deyu cevâb verdiği bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Ahmed Çelebi b. Budak, Yusuf Çelebi b. Budak, İlyas b. Hasan, Mehmed b. Behrâm ve gayruhüm