Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 382 Hüküm no: 676 Orijinal metin no: [64a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Ağa Vakfı’na ait yerleri işleten Salti’nin vakıf şartlarına uygun davranmadığından öşür istendiği Merhûm Abdullah Ağa evkāfına bi’l-fi‘l mütevellî olan fahrü’l-emâsil ve’l-akrân Fazlı Çelebi mahfil-i kazâda merhûm-ı merkūmun evkāfından karye-i Kuzguncuk sâkinlerinden Şaban Şaban oğlu demekle ma‘rûf Salti nâm Yahudi mahzarında takrîr-i kelâm ve ta‘bîr-i merâm edip merkūm Yahudi vakf-ı mezbûr sınırında on altı bin yedi yüz zirâ‘ yeri çevirip içinde bostan ve dolab ve bahçe ve bağlar gars edip şart-ı vâkıfdan ve defteri hâkānîde öşür kayd olunmuş iken hevâsına tâbi‘ mütevellî-yi sâbık bir mikdâr nesne verme ile her yılda hilâf-ı şart-ı vâkıf ve muğâyir-i defter elli akçe mukāta‘a bağlatıp vakfa gadr etmişdir şart-ı vâkıf ve defter-i hâkānî ve mülknâme-i hümâyûn ve defter-i hâkānîde öşr-i bostan ve öşr-i bağ kayd olunduğun beyân eylesin dedikde vakf-ı mezbûrun mahsûlünden öşr aldığı a‘yân-ı vilâyet mukarrer olmuş idi olup ve mütevellî-yi mezbûr yedinde olan tuğrâ-yı hümâyûn ile mu‘anven defter ve mülknâme-i hümâyûn ibrâz edip mazmûnunda öşr-i bostan ve öşr-i bağ ve öşr-i bahçe kayd olunduğu mukarrer olup kırâ‘at olundukda bâ-arz-ı Müslümanlar ile üzerine varıp mezbûr Yahudi’nin tasarrufunda olan bağ ve bahçe ve bostan yılda ba‘de’l-harâc beş bin akçe mikdârı mahsûl ve emeği mütehammildir deyu haber verdiklerinde mezbûr Yahudi ve sâir bağ ve bahçeler ber mûceb-i defter ve vakıfnâme öşr vermeye emr olunup ve mâ hüve’l-vâki‘ tahrîr olunup yed-i mütevellîye verildiği müzekker ola. Tahrîren fî evâsıtı Zilka‘deti’l-harâm li sene elf. Şuhûdü’l-hâl: Hacı Hüseyin b. Mustafa, Hüseyin b. Behrâm, Mehmed b. Behrâm, Hasan b. Sâdık