Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 382 Hüküm no: 677 Orijinal metin no: [64a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Para kaçakçılığı zannıyla yakalanan Hasan b. Mehmed’in, kendisini yakalayan Hürrem Yeniçeri hakkındaki davası Tüccâr tâifesinden Hasan b. Mehmed mahfil-i kazâda Hürrem b. Abdullah nâm yeniçeri mahzarında takrîr-i da‘vâ edip mezbûr Hürrem beni ahz edip odasında habs edip on iki taşra guruşdan bir taşra guruşum alıp andan salıverdi suâl olunup vukû‘ı üzre tahrîr olunmasın taleb ederim dedikde gıbbe’s-suâl mezbûr Hürrem Bey cevâb verip merkūm Hasan hilâf-ı emr-i pâdişâhî guruş kaçırıp Üsküdar’a geldikde ahz edip mahrûse-i mezbûrede eşkiyâyı hıfz için ta‘yîn buyurulan çorbacımız Mehmed Subaşı’ya iletip andan mahkemeye getirirken sipâhiler cebren elimden aldılar mezbûrun guruşunu almadım ve haberim yokdur gümüş arayıcıya haber verdiğim için iftirâ eder dediği bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Müstedâm Bey el-cündî, Şaban Efendi el-kadı, Mehmed b. Behrâm, Hüseyin [b.] Behrâm ve gayruhüm