Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 387 Hüküm no: 687 Orijinal metin no: [65a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Hasan’ın, tarlasını Mihal v. Kosta’ya sattığı Kefçe mahallesinden Mahmud b. Hasan karye-i Kadı’dan Mihal v. Kosta mahzarında ikrâr edip karye-i mezbûre sınırında Uncu Kosta ile ve Todoro Reis bağlarıyla ve İbrahim Ağa Vakfı’yla ve iki tarafı tarîk-i âmla mahdûd olup tahmînen on sekiz keyl tohum alır tarlayı sâhib-i arz ma‘rifetiyle mezbûr Mihal’e on altı bin akçeye hakk-ı tasarrufunu tefvîz ve mukābele-i tefvîzde meblağ-ı merkūmu alıp zikr olunan tarla mezbûra teslîm eyledim dedikde mukırr-ı mezbûrun ikrâr-ı meşrûhunu mukarrun lehü’l-merkūm vicâhen tasdîk eylediği kayd şud. Şuhûdü’l-hâl: El-Hâc Memi b. Abdullah, el-Hâc Hüseyin b. Abdullah, Çoban Mustafa er-râcil, Süleyman Bey b. Kasım er-râcil, Muttalib b. Süleyman, Mustafa b. Mehmed, Yusuf b. Abdullah, Şemseddin [b.] Sâdık, Hasan Bey [b.] Abdullah ve gayruhüm