Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 389 Hüküm no: 694 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Hayreddin Bey’in borcuna karşılık çayırını rehin verdiği Kıdvetü’l-emâsil ve’l-akrân Dergâh-ı âlî çavuşlarından Mehmed Çavuş b. Hayreddin Bey mahfil-i kazâda hâssa bostancılar kethüdâsı olan kıdvetü’l-havâs ve’l-mukarrebîn Behrâm Ağa cânib-i şerîflerinden vekîl olup vekâleti nehc-i şer‘î üzre sâbit olan hâssa bahçe üstâdı Mehmed Usta mahzarında ikrâr ve takrîr-i kelâm edip müşârunileyh Behrâm Ağa’dan alâ tarîki’l-karz elli bin akçe alıp mukābelesinde mahrûse-i Üsküdar’da hâssa doğancılar odası kurbunda vâki‘ bir tarafı Küçük Bâli Çavuş mülkü ile ve bir tarafı Doğancı Süleyman mülkü ile ve iki tarafı tarîk-i âm ile mahdûd ve mümtâz olan çayırımı taş duvar ile ve eşcâr-ı müsmire ve gayrımüsmiresiyle rehin vaz‘ eyledim dedikde mukırr-ı mezbûrun vech-i meşrûh üzre vâki‘ olan ikrârını vekîl-i merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fî evâhiri Zilka‘deti’l-harâm sene elf. Şuhûdü’l-hâl: Hacı Hüseyin [b.] Mustafa, İlyas Bey el-cündî, Hacı Kurd b. Beşir, Hasan b. Abdullah, Ali Halîfe b. Mahmud ve gayruhüm