Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 255 Hüküm no: 240 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Hüseyin evindeki hissesini eşi Fâtıma bt. Hüseyin’e sattığı Mübâya‘a-i nısf-ı menzil. Mahmiye-i İstanbul’da Müftî Aliçelebi Mahallesi sükkânından Mustafa Çelebi b. Hüseyin nâm kimesne meclis-i şer‘-i şerîf-i enverde hâlâ zevce-i menkûhası bâ‘isetü hâzihi’l-vesîka Fâtıma bt. Hüseyin tarafından husûs-ı âti’z-zikri tasdîka vekîl-i şer‘îsi olan Üsküdarî el-Hâc Hüseyin b. Mehmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre Fâtıma Hatun ile ale’l-iştirâki’s-seviyy silk-i mülk-i sahîhimizde münselik olup mahalle-i mezbûrede vâki‘ bir tarafdan Rahime Hatun menzili ve bir tarafdan Kâmile suyu yolu ve bir tarafdan utekā meşrûtası olan vakf menz[il] ve bir tarafdan tarîk-i âm ile mahdûd iki bâb fevkānî oda ve bir sofa ve bir kuyu ve bir havlu ve kenîf ve eşcâr-ı müsmire ve gayr-ı müsmireli bahçeyi müştemil menzilden benim hissem olan nısf-ı şâyi‘im cemî‘ tevâbi‘ ve levâhıkı ile tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcem müvekkile-i mezbûre Fâtıma Hatun’a iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr iki yüz elli guruş mütâlebesinden zevcem müvekkile-i mezbûre Fâtıma Hatun’un zimmetini ibrâ ve iskāt eyledim ba‘de’l-yevm zikrolunan nısf hissem dahi mezbûre Fâtıma Hatun’un mülk-i müşterâsı olup benim kat‘â alâka ve medhalim kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 21 Cumâdelâhire sene [1]143. Şuhûdü’l-hâl: Attâr İsmail Çelebi b. Abdullah, bâyi‘-i mezbûrun karındaşı Ahmed Çelebi, Çardak kapısı karşısında Bekçi Mehmed Beşe, Mehmed Çelebi b. Abdullah bölükbaşı, Du‘âcı İbrahim Çelebi b. Mustafa muhzır, Ya‘kub Çelebi b. Abdullah muhzır, Salih Çelebi b. Süleyman muhzır.