Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 254 Hüküm no: 239 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Ali b. Mehmed ile sadrazam ağalarından el-Hâc Mustafa Ağa’nın aralarındaki alacak davasında sulh oldukları Sulh. Vilâyet-i Anadolu’da vâki‘ medîne-i Van ahâlîsinden ve medîne-i mezbûre rûznâmçecisi olup mahmiye-i İstanbul’da Mahmud Paşa Câmi‘-i şerîfi kurbünde Hoca Hânı’nda müsâfiren sâkin Halil Ağa b. Ali b. Mehmed nâm kimesne meclis-i şer‘-i hatîr-i lâzımü’t-tevkīrde sadrâzam ağalarından sâhibü hâze’l-kitâb el-Hâc Mustafa Ağa b. Mehmed b. Abdurrahman tarafından husûs-ı âti’z-zikre vekîl sâbitü’l-vekâle vekîli olan Mustafa Ağa b. Osman nâm kimesne mahzarında ikrâr-ı tâm ve takrîr-i kelâm edip bundan akdem mârru’z-zikr Van’ın yemîn ü yesâr ve merdân ve azebân ve çavuşân ocakları bi’l-külliye ref‘ olunmağla târih-i kitâbdan bir sene mukaddem diyâr-ı İran’da vâki‘ Tebris’de (Tebriz) mârru’z-zikr dört ocak zâbitân ve neferâtları taraflarından zikrolunan ocakları kemâfi’l-evvel ibkā ve mukarrer ettirmek için müvekkil-i mezbûr el-Hâc Mustafa Ağa’ya iki bin yedi yüz guruş def‘ ve teslîm ol dahi yedimden ber-vech-i muharrer ahz u kabz etmekle hâlâ meblağ-ı mezbûr iki bin yedi yüz guruşu müvekkil-i mezbûrdan taleb ve da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut ve da‘vâ-yı mezbûremden beni müvekkil-i merkūm el-Hâc Mustafa Ağa ile iki yüz yirmi beş guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz yirmi beş guruşu müvekkil-i merkūm el-Hâc Mustafa Ağa yedinden bi’t-tamam ve’l-kemâl ahz u kabz edip akd-i mezbûr kendi yedim ile olduğuna binâen meblağ-ı mezbûrun mâ‘adâsı olan iki bin beş yüz yetmiş beş guruşa müte‘allika âmme-i de‘âvî ve kâffe-i mütâlebât ve muhâsamâtdan müvekkil-i merkūm el-Hâc Mustafa Ağa’yı ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Cumâdelâhire sene [1]143. Şuhûdü’l-hâl: İsmail Ağa b. Mehmed, diğer el-Hâc İsmail Ağa b. Mehmed, Yedekçi Ahmed Ağa b. Mehmed, Kahveci Ahmed Çelebi, gönüllüyân ağası Mustafa Ağa, Delibaşı Hasan Ağa.