Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 396 Hüküm no: 710 Orijinal metin no: [67a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Şaban’ın, ölen İbrahim b. Şaban’ın kardeşi olduğu ve terekesini aldığı Budur ki Rumeli’nde İzvornik sancağında Memlaha-i bâlâda sâkin olan Yusuf b. Şaban mahfil-i kazâda mahrûse-i Üsküdar’a subaşı ve emîn-i beytülmâl olan fahrü’l-akrân Müstedâm Bey mahzarında takrîr-i kelâm edip hâlâ mahrûse-i mezbûrede vefât edip zâhirde vârisi yokdur deyu muhallefâtı beytülmâl için kabz olunan İbrahim b. Şaban benim li eb ve üm karındaşımdır ve beynenâ ma‘lûme olan işbu muhallefâtı bana âiddir taleb ederim dedikde gıbbe’s-suâl mezbûr Müstedâm müteveffâ-yı mezbûrun karındaşı idiğini beyân eylesin dedikde udûl ve sikātden kıdvetü’l-ümerâi’l-kirâm Ahmed Bey hazretleri ve kıdvetü’l-mülâzimîn Osman Efendi b. Budak ve Ali Bey b. Behrâm ve Hüseyin Bey mahfil-i kazâya hâzırûn olup müdde‘î-i mezbûr Yusuf müteveffâ-yı merkūm İbrahim’in li eb ve üm karındaşı olup ve verâseti buna münhasıra olup bundan gayrı vârisi vardığını bilmeziz dediklerinde ba‘de’t-ta‘dîl hayyiz-i kabûlde vâki‘ olup müteveffâ-yı merkūmun mezbûr Yusuf vârisi idiğine hükm olundukdan sonra mahfil-i kazâda karındaşım İbrahim’in ma‘lûme ve makbûze olan cemî‘ muhallefâtın mezbûr Müstedâm yedinden bi’t-tamâm aldım kabz eyledim zimmetinde bir akçe ve bir habbe bâkī kalmadı deyu ibrâ’ edicek mâ vaka‘a bi’t-taleb tahrîr olundu. Şuhûdü’l-hâl: Hüseyin Efendi el-kadı, Muttalib [b.] Süleyman, Ali Halîfe el-müstaid, Mehmed b. Behrâm, Hasan [b.] Sâdık ve gayruhüm