Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 397 Hüküm no: 711 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bekir b. Mehmed’in, ölen Hüseyin b. Mehmed’in kardeşi olduğu Maraş’dan Bekir b. Mehmed nâm kimesne mahfil-i kazâda mahrûse-i Üsküdar subaşısı ve emîn-i beytülmâl olan fahrü’l-emâsil ve’l-akrân Müstedâm Bey mahzarında takrîr-i kelâm edip hâlen mahrûse-i mezbûrede vefât edip zâhirde vârisi yokdur deyu muhallefâtı beytülmâl için kabz olunan Hüseyin b. Mehmed benim li eb ve üm karındaşımdır ve beynenâ ma‘lûme olan işbu muhallefâtı bana âiddir taleb ederim dedikde gıbbe’s-suâl ve akībe‘l-inkâr udûl ve sikātdan vilâyet-i mezbûrede tîmar defterdârı kıdvetü’l-emâcid ve’l-a‘yân Mehmed Efendi ve Hüseyin b. Çalabverdi nâm kimesneler edâ-yı şehâdet-i şer‘îyye edip müddî‘-i mezbûr Bekir müteveffâ-yı merkūmun li eb ve üm karındaşı olup ve vârisi olup verâseti buna münhasıradır bundan gayrı vârisi vardığını bilmeziz dediklerinde ba‘de’t-ta‘dîl hayyiz-i kabûlde vâki‘ olup mezbûr Bekir’in vârisi idiğine hükm olunup ve mâ hüve’l-vâki‘ bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Ali Çavuş Dergâh-ı âlî, Fahrü’l-emâsil Himmet Alaybeyi, Seyyid İbrahim b. es-Seyyid İbrahim, Musa Bey b. Mehmed ve gayruhüm